Do姐「找數」請最乖男團P1X3L上節目 讚《造星II》Phoebus成熟適合做隊長

更新時間 (HKT): 2021.05.25 20:03

鄭裕玲(Do姐)早前現身MIRROR首場演唱會,更跟《全民造星II》出身的男團P1X3L「調位」結緣,Do姐大讚新組合P1X3L好乖好有禮貌,當日主動上前自我介紹,不像時下一般年輕藝人不夠膽量,讓她留下良好印象,Do姐揚言一定要請他們上節目,又稱要播多些他們的歌,Do姐一向言出必行,今日「找數」請三子上商台節目《口水多過浪花》。

Do姐請她眼中好乖有禮貌的男團P1X3L成員吳啟洋(Phoebus)、歐鎮灝(George)及葉振弘(Marco)上節目,他們更向Do姐送上心意卡,不少網民大讚Do姐是好好的前輩,肯畀機會新人,見Do姐全程好錫他們,不時問問題,讓他們多些機會於大氣電波介紹自己,讓更多人認識。

Do姐直接問Phoebus為何當時這麼有膽量,Phoebus解釋:「當時喺VIP房,因為間房唔係好大,但見大家等緊嗰陣氣氛有啲尷尬,我哋又好新,又唔多人認識,我睇開Do姐節目,又好鍾意你,咁就諗不如我哋三個打聲招呼先啦!」

讓位給Do姐留好印象

Do姐先讚Phoebus作為新人的態度正確:「我鍾意呀!又幾好,始終你哋好新,周圍介紹吓係應該,我都有同助手講呢三個男仔幾乖,如果有新歌,我哋訪問佢,殊不知出到去就你哋幫忙,我都有講過花姐好好安排我哋坐第一行,第一行係好痛苦,太近嗰個台,我一眼就見到P1X3L呢三位哥哥仔坐喺第七行,我叫助手問你哋肯唔肯調位,你哋都好慷慨地調。」

Do姐再問坐第一行看個唱是否很辛苦,George笑說:「Do姐真係多謝你,如果唔係你同我調位,我都唔知原來第一行係咁好睇、好精采,因為太近,因為我會見到Lokman同Anson Lo係咁電你,個感覺好近,好開心!」Do姐稱只看不到對腳,又要好似瞓喺度睇騷,George搞笑說:「上半身都好足夠!」Phoebus稱很少去睇演唱會,對上一次睇容祖兒個唱,之後就睇MIRROR個唱。

Do姐安排他們輪流介紹自己,George指當初公司想看看他們三子有甚麼花火就開一個綜藝節目,後來覺得他們有熱誠便跟他們簽約,Phoebus和George本身是《全民造星II》十強,公司一早想簽他們,而Marco本來沒被選中:「公司好快去培訓佢哋,我係遲少少入去,咁老闆搵人打畀我,就問我『想唔想返嚟公司見老闆,我話『好呀』,之後返咗去,問我覺得男團應該係點樣,我話『我好鍾意,好有興趣』,就慢慢向呢個方向去發展。」

Phoebus解釋隊名P1X3L是由公司選的,望他們三為一體,而P1X3L(Pixel)意思是像素,因為公司覺得他們各自色彩,認為他們雖是不同個體,拍埋一齊又有更多元素給觀眾睇,Do姐問到他們相處如何?Phoebus笑稱之前上另一個節目,七師傅幫他們看八字,指他們八字不合,建議他們表演完不要打招呼,完騷轉身就要走,George笑說:「盡量少啲嘢講。」之後七師傅稱幫他們化解。

戥同門師兄MIRROR開心

在言談間,Do姐讚Phoebus適合做隊長,整體表現成熟,問及三子未來有何大計,Phoebus希望將來可以多方面發展,「高度我控制唔到,但我控制到自己態度,希望每一件事都做好佢,參加《造星II》曾覺得唔鍾意自己,點解自己唱得咁難聽、跳得咁差,現在希望一步一步做好佢」,而Marco想將來有機會開演唱會,感受觀眾歡呼,上次見到MIRROR開騷,「本身識佢哋,個個好似越嚟越勁,又咁多fans瘋狂支持,好戥佢哋開心」。

講到Marco經常被恰,Marco:「又唔完全係,佢哋兩個係哥哥feel,私下好照顧我。我中學時已經好鍾意唱歌,想喺呢行發展,之後去韓國學跳舞,想成為跳唱歌手。一開始我好驚訝,佢哋兩個咁靚仔,我會覺得大家之間有差距,慢慢熟絡,大家有火花,相處都幾舒服。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner