視點31|玻璃朱稱撐警人太少要走出來表態 盧覓雪指足本版要過港台高層一關

更新時間 (HKT): 2021.05.25 22:40

靠炒熱話題和廣結圈中人脈而獲取知名度的「玻璃朱」朱庭萱,今日下午3時和名嘴盧覓雪(Michelle)應港台《視點31》之邀,出席主題為「娛樂為甚麼?」的討論會,探討近期娛樂熱話以及TVB和ViuTV兩台大戰的辯論。雖然原定的直播改為晚上8點轉播,但兩位當事人未辯論,網民已先興奮,而盧覓雪的DJ好友亦變成打氣團,至於身在台灣的杜汶澤亦幫手還原被指過度P圖的「玻璃朱」真面目

盧:娛樂節目硬加社會責任係「多餘」

在今晚節目中,盧覓雪和「玻璃朱」在只有開首短短7分鐘的節錄內容中,雙方氣氛尚算溫和客氣,其間二人辯論多個議題,包括娛樂節目是否需要履行社會責任、電視台是否被人扣上顏色帽子,藝人應否表達自己政治立場等。首先發言的盧覓雪,認為娛樂節目硬加社會責任是「多餘」的,她說:「娛樂節目係提供娛樂嘅,如果嗰個節目係令到觀眾好開心,去追住去睇,已經達到目的,所謂社會責任係要政治好正確?一定要歌功頌德或者一定要表示支持呀,一啲表態式嘅嘢,我覺得其實係一種硬加喺娛樂節目上面嘅事,係會適得其反嘅!」而「玻璃朱」就認為娛樂好重要,但就要有底線。「我都同意娛樂節目係咪要去到好硬膠、植入式去擺一啲道德觀念好重嘅嘢,係冇需要,不過YouTube之前有啲片係用腳整到對方撻低,覺得好好玩、好funny,但原來試過有人終身殘廢,咁呢個咪係一個唔好嘅訊息呢?係好娛樂,但係要有個社會責任,有啲係危險、有啲係過咗底線,我覺得我哋要守住呢個底線。」

對此,盧覓雪認為獲發牌的電視台節目,本身已設有底線及已有一套規則要遵守。「我係睇《歡樂今宵》嗰一代大嘅,咁嗰時都會有『嗱,呢啲危險動作家庭觀眾就唔好學喇,佢哋經過長期訓練㗎!』呢類家長式嘅警告已經做咗,甚至有啲節目嘅播映時間特登放喺夜啲嘅時段,叫做寬鬆少少嘅時間區域,本身嗰啲(節目)已經做晒體檢囉喎,做晒體檢都話唔得?咁我就覺得過份苛刻囉!」

朱:扣咗TVB係藍 ViuTV係黃

之後,主持彭德章提到藝人政見及黃、藍之分,「玻璃朱」說:「我自己就覺得有扣呢個顏色帽子,自從反修例風波開始,就扣咗TVB係藍喇,ViuTV就係黃嘅,點解呢?有人覺得TVB就一定係親中嘅,而ViuTV就係香港人嘅,其實點解會扣呢啲咁嘅帽子,我當一啲TVB藝人,佢哋冇表態,冇顏色甚至冇立場嘅,佢只係想做好自己份工,但一句『你係TVB,不了,我要打壓你!』甚至搵TVB落廣告,網上有一啲欺凌『嗱,大家記住喇,呢個牌子我哋去畀嬲嬲啦,跟住我哋就去投訴喇,例如食肆我哋去報食環我哋去杯葛!』不斷喺度鬧鬧鬧,結果我聽返TVB廣告部啲同事講,每一次落廣告,個個之後唔敢返轉頭,因為不斷收到呢啲騷擾,即係點解要去到一個顏色嘅打壓……」

此時,盧覓雪即打斷「玻璃朱」說:「如果你講打壓呢,其實雙方面都承受緊嘅,所謂黃同藍,學佢(朱庭萱)話齋,你都唔知佢係黃定藍,不過有人話佢係黃,有人話佢係藍,呢個世界其實可以返轉頭去諗嘅,唔落廣告,唔支持你我要嬲嬲豬你,黃嘅其實一樣係受到打壓嘛!」盧覓雪認為在她認知中,除了《大公報》、《文匯報》外,任何一間傳媒機構都是中性,點解有人要扣TVB帽子認為是藍媒,她認為某程度上因為電視台較多人出來表態,她指「玻璃朱」亦有一堆撐警TVB朋友。另外TVB的台風和新聞部在處理新聞手法、高層出來的言論,加起上來便會有所謂黃、藍之分。

朱:不建議藝人表態

在結尾部份,「玻璃朱」坦言不建議藝人表態,原因是會失掉另一半觀眾,自己之所以表態,是由於自己並非正式藝人,沒有包袱。「點解我要表態?嗰個環境點解我要撐警或者叫做藍啦,因為驚人太少喇,覺得唔出嚟撐佢哋就好可憐,同埋我正職唔係做呢行,我做股票之嘛,冇所謂啦,唔一定要靠呢行搵飯食,死就死啦!」她認為TVB早前報道新聞,有影警察有影暴徒,結果被暴徒話「你做乜影我大頭呀?你睇吓NOW TV同有線,全部唔影我哋大頭嘅,扭歪個鏡頭。」「玻璃朱」說:「佢哋做壞嘅嘢就扭歪個鏡頭,咁究竟呢啲係一個慫恿定係一個中立嘅報道呢?所以啲人好難避免唔將一啲電視台去扣帽子。」

盧:臨尾5分鐘有火花

由於7分鐘節目內容最尾由「玻璃朱」作總結,有網民認為港台有偏幫和篩選之嫌,《蘋果》今晚致電盧覓雪,她澄清節目頭7分鐘,雙方的確是這些言論內容,是順序播出,並無任何刪減。「係呢啲嘢,不過噚日港台通知我話上頭有調動,要取消facebook live,個節目會照錄,容許出7分鐘,餘下仲有大約20幾分鐘嘅完整節目,聽日要大老細睇,批准咗先有得出街,唔批准冇得出街添。」問到節目後段有否和「玻璃朱」擦出火花?她說:「臨尾5分鐘都有啲火花,但出唔出到街都未知,我想講嘅論點都有講到出嚟嘅,但講返畀你哋聽變咗有啲唔道德,好似得我一個講,咁我自己作都得啦。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner