滿腹金句 愛改歌詞好唱口

更新時間 (HKT): 2021.05.25 02:00
■周聰玲分享拍攝趣事及生活態度時,經常金句王上身。

周潤發胞姊周聰玲除了擅長攝影,原來也是金句王。半日南丫島遊,玲姐見記者為她多角度拍照,即開玩笑:「一張起,兩張止,三張係咁意,四張都嫌費事,五張嘥gas。」講到為何愛攝影,玲姐就說:「捉棋搵對手,跳舞搵partner,影相我話事,我鍾意影乜就影乜。」她形容自己:「日日好時光,快樂又健康,癲癲廢廢,做人唔識閉翳,神神癲癲,快活過神仙」,她最愛拍下美麗大自然宣揚環保訊息,「人哋環遊世界,我就環遊新界。」玲姐愛逍遙自在,她認為做人越簡單平凡,就無壓力,人都變得健康開心。

至於金句令人笑爆嘴,玲姐表示︰「呢啲係『順口溜』,我用唐詩嗰啲押韻,隨口講咗出嚟。以前細個俾阿媽鬧,我會話『側側膊唔多覺,阿媽鬧唔好駁,睇大戲落北角』。」玲姐自爆某次出席友人母親壽宴湊熱鬧唱K,點唱許冠傑的《尖沙咀Susie》,友人一臉尷尬,原來玲姐把歌曲二次創作成《我的媽咪》送壽星婆,她唱:「有佢咁有型呀,冇佢咁好玩,我的媽咪認真咁簡單,樣貌與身材望落不起眼,想搵多個都好難,有佢咁有型呀,冇佢咁夠盞,我的媽咪喜歡煮兩餐,約埋張太李太嚟食晏,思想開放好識嘆……」神來之筆改歌詞令賓客聽出耳油,拍案叫絕。

娛聞樂陪你走遍全球追星,即Like「娛果」FB 專頁!
BannerBanner