夾埋100歲丨趙學而開放談性經驗 阮小儀有意挑戰試玩麻繩

更新時間 (HKT): 2021.05.26 20:00

同為50歲,鏡頭前的趙學而與阮小儀,一個穿上牛仔短褲襯斗零踭,另一個穿花碌碌公仔鬆身Tee;前者已為人妻,後者還在公海中浮沉找機會泊岸,她們打扮雖然年輕,其實在心理上已坦然面對人生轉到另一關口。她們早前一起宣傳ViuTV新節目《中女唔易做》,坦言不介意年華開始漸去、身材開始走樣、樣貌敵不過地心吸力而有所改變,輕鬆面對變化,明白珍惜仍然擁有的光陰及享受人生,對自己好才是最重要的生活元素。

公開講性

二人暢所欲言沒避忌,投契得有意合力開網上頻道,分享養生、或別人難於啟齒的性經驗。近日與人氣組合MIRROR「走得很近」的小儀,大膽地笑言:「想唔想試吓麻繩?呢個領域未試過,我都想試吓!如果我哋兩個一齊做,講更年期都好。」學而也大表贊成:「講少女期、講吓關於嚟月經嘅事,有時會遇到疑惑、一啲經驗,可以坦坦白白討論。性事都可以講,因為以往嘅前輩可能會怕醜,唔會講得咁坦白。」

中女心理

踏上五十路的學而,覺得30多歲已步入中女階段,自言當時負資產、又甩拖,但一個人生活很自在:「我唔擔心,雖然一個人孤零零,但一個人去邊都開心,可以好享受,睇多啲個世界,識多啲唔同嘅人,然後自己再慢慢揀。唔拍拖一陣都唔係問題,可能我由細到大對自己都有啲信心。」

相反小儀差不多踏入中女行列時與拍拖多年的同學男友分手,結婚生仔自覺渺茫,心理很大壓力:「嗰陣入咗行,覺得更加難識男仔,仲要我冇靚樣,森美當時話,外面嘅男仔要識藝人,點會夠膽搵你,唔驚俾人笑呀?到40會為自己擔憂,會唔會件事冇喇?但過呢一關,開始隨遇而安,唔係搵結婚對象,係要一個伴侶令你餘下人生快樂,有幸福感覺,唔使要名份肯定。4字頭生仔係好渺茫,但冇咗呢個擔憂就好輕鬆,我越來越享受而家年紀,做每樣嘢忠於自己,唔好害人,咁就好快樂。」

小儀對着MIRROR的呂爵安(Edan)心心眼,她不抗拒比自己年紀小的人拍拖,年齡沒掣肘:「人生若諗得灰啲係倒數,但諗好啲就因為倒數,所以每分秒都係要過得精采,要對自己好,只要溝通到唔係問題。」

學懂欣賞自己變老

早年小儀曾遇甲狀腺問題,令她學懂真正享受生活,正如在節目中當農夫領悟慢活的需要:「以前每日掛住錢、工作,顧住做出來嘅嘢人哋認唔認同,生活好急,變咗有壓力都唔知,急到得出甲狀腺呢個問題,身體話畀你知唔得就要諗吓,真係唔可以咁,唔可以顧住搏殺。」

學而在旁提醒要有質素的生活,講求養生,要善待身體。二人亦認為可以跳出習慣的框框,嘗試新工作新事物,但不追求完美的外貌,學而堅拒做美魔女:「我唔要零毛孔,人要有缺憾,眼袋、皺紋、雀斑,呢啲陪住我哋成長,唔可以抹走。推淋巴、推下巴係可以,但注射入身體嘅就唔得,外貌唔使同人比較,人老自然有皺紋,自己懂得去欣賞每日唔同狀態。」

服裝:tout à coup(趙學而)、STARS & TART(阮小儀)

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner