林日曦搞舞台劇想搵193演出 無奈改由東方昇「執二攤」

更新時間 (HKT): 2021.05.26 06:00

林日曦(腦細)、白只、楊偉倫(阿卵)這個舞台劇組合並不算新鮮,他們於2019年主演過舞台劇《大辭職日》,當時還有宣萱孭飛。最近3人再度合作,他們化身MK仔,為全新舞台劇《大MK日》粉墨登場。一個講述MK仔發奮參加歌唱比賽的勵志喜鬧劇,既有友情、勵志、挫折跟血與淚,希望為現時沉重的香港人帶來歡樂的一刻。身兼老闆、編劇與主演的腦細多月來盡心盡力,不想辜負觀眾,他保證說:「因為社會唔開心,生活唔開心,觀眾入得場睇,都追求有嘢帶走,笑係先決,入到嚟就有開心忘憂嘅一晚,係最重要,至於收到嘅訊息就係bonus。」

他們日前在荃灣為舞台劇綵排,今次演出還有腦細旗下的毛記主播東方昇(王嘉偉),腦細笑言本來首選是找當紅的193(郭嘉駿),不過因沒有對方電話,東方昇變相「執二攤」,腦細笑說:「其實票房都擔心㗎,因為上次都有宣萱同林雪孭飛,今次得我哋3個,於是乎冇辦法真係要搵一個人孭飛,呢期最紅係邊個?梗係193,但我冇佢電話,咁最簡單搵邊個?咪係東方昇,但都唔簡單㗎,好彩我用誠意打動咗佢,咁就冇咁擔心。」

東方昇沖個涼令自己紅啲

東方昇笑指腦細講假話,他更自嘲說:「其實上次《大辭職日》我喺台下做觀眾,都已經好想參演,今次本身冇我份,未夠紅我明白㗎,於是沖個涼令自己紅少少,咁就join埋佢哋嘞。」東方昇劇中飾演一個大隻佬反派,是執法機構的保安員,打壓商場內的MK仔。他又指能夠跟久仰的組合朱凌凌成員白只和阿卵合作,令他享受其中。

腦細、白只與阿卵飾演的MK仔,要重返14歲就讀中二那時候的反叛模樣,新界仔白只自爆不懂潮文引發笑料,他說:「演MK仔唔難,難就難在對手同觀眾會覺得好難受,我哋3個其實已經進入狀態,冇自我感到肉酸嗰種感覺,要我哋演中學時代撩是鬥飛。我絕對唔係一個MK仔,我係一個新界仔嚟,對網上文化好慢,初頭我唔知原來一啲台詞係唔可以刪,我仲用我嘅方法化咗佢,跟住導演會同我講一定要講嗰句觀眾先會識得笑,原來好多句都係好出名嘅說話嚟,對白絕對係抵死啜核。」

MK仔 VS 新界仔

不過白只直指被東方昇連累︰「其實佢有少少連累咗我哋,我哋望住佢就喺度笑,但我哋唔可以笑㗎嘛,真係需要處理好呢個問題。」阿卵則謂:「好抵死㗎!除咗網上流傳嘅潮文,劇本真係好多嘢好笑。大家越嚟越有默契嘅時候,係會留意到隔鄰嗰個人陰濕笑,我哋係需要好畀心機忍笑。」白只又不時歌頌腦細的劇本好笑又熱血,在旁的腦細笑指他們鏡頭前不夠真誠,白只卻感性說:「我第一次睇到劇本嗰陣,嗰個完成度已經有90分,嗰個好笑同溫暖程度,而家呢代觀眾,喺而家算係疫情中後期入返嚟睇,係會有笑同溫暖感覺。經過3個月嘅進化,啱啱又收到一個新嘅稿,雖然台詞又要再背過,辛苦少少,但係溫暖感會再大啲,改動係好。」

訪問當日門票未開賣,腦細對票房感到擔心,他說:「係擔心嘅,都有定心理準備(因疫情影響),其實票務同行政上做嘅準備、工作量多好多,監製黃智龍都好辛苦。其實票房就等於製作費,一啲規模細小小嘅劇場仲困難,有時連七成半入座都冇,翻本都有困難,疫情係千年難得一見,大家都要支持更多細嘅劇場,係好辛苦!大家入嚟開心一晚,係會有得着。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner