肥媽太掛住已離世老公 夢遊煮飯要睇心理醫生

更新時間 (HKT): 2021.05.27 18:33
(影片截圖)

現年67歲的肥媽(Maria Cordero)因無綫推「限廚令」,轉戰去YouTube做直播教煮餸,每月拍四日已穩袋六位數,並自爆最高一次收40幾萬,人工高過TVB。日前肥媽開live期間,被網民發現手臂出現一道明顯瘀傷,她指是自已夢遊時不慎撞傷。

肥姐說:「夜晚夢遊時會落廚房煮飯畀老公食,我完全唔知道。試過有次直情煮到啲嘢燶晒,鑊都燶埋!所以而家每晚都會將煤氣總掣熄晒先去瞓,就算落嚟都冇得煮。」肥媽與丈夫Rick結婚21年,但Rick於2017年患上末期肺腺癌,延至去年離世,但肥媽仍一直非常掛念老公,她說:「初初我仲問邊有人夢遊會煮飯,後尾睇到佢哋影相,咁冇得呃啦。我有睇心理醫生,佢話煮飯係我最開心嘅嘢,我最深層嘅嘢係想煮飯畀人食。醫生話唔知係咪我太掛住老公,係心理病嘅一種,我話我都冇辦法,我真係掛住佢吖嘛。」

另外,肥媽指自己曾多次感受到丈夫回魂,發現丈夫生前喜歡吃的食物,第二朝會離奇消失,而狗狗們亦會在樓梯位置做出一些特殊行為,令她感受到丈夫在身邊。醫生曾勸她服用鎮定劑或安眠藥,兒子又希望她退休,但遭肥媽一一拒絕,她說:「如果完全唔做嘢,可能好快會病!」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner