Supper Moment下月九展開騷 拍片首談「搖滾叛徒」指控

更新時間 (HKT): 2021.05.28 14:31

「人生夢一場,革命至蒼老」,今年是樂隊Supper Moment(SM)成軍15年,2013年因《無盡》爆紅,行熱血同搖滾路線,被樂迷視為與港人同行、難得有態度的「香港天團」,去年SM網上音樂會遭劣評,被指潛水一年,部份樂迷有感SM失去靈魂,半途已「蒼老」,但是仍有死忠樂迷對他們不離不棄!

Supper Moment早前講過今年內開實體演唱會,預計年底舉行。不過昨日網上傳出他們將於6月在九展Star Hall開2場演唱會,更指要加入某網上平台成為會員才可以買優先門票,票價「設有$780、$580、$280三款」。

今日Supper Moment正式宣佈開騷,將於6月26至27號一連兩日在九展舉行15周年活動,《Supper Moment 一直相信演唱會》門票將於2021年5月31日早上10時起於快達票公開發售。Supper Moment再開騷 ,不少樂迷聞風隨即起哄,主辦稱今早內部認購電話亦已被打爆,想不到連演唱會海報都未出街,內部認購已秒速爆滿。

Supper Moment 得知消息表示開心,多謝樂迷支持,「開兩場又因為疫情關係,飛真係唔多,希望歌迷可以公開發售時買到」,問到他們為何在九展開騷,因受疫情影響,他們當初不敢亂入紙攞紅館檔期,回想「15年前第一個大型演唱會『再次心跳』就是係九展起步,所以作為紀念,就選回九展」。

SM回應「潛水」

講到早前Supper Moment為撐修哥,答應做紅館演唱會嘉賓,更因陪修哥上TVB綜藝節目宣傳,合唱《舊歡如夢》淪為網民笑柄,指摘他們為賺錢做「搖滾叛徒」,又因推出普通話歌指罵他們「剩係識得搵人仔」,不回應不發聲就是害怕潛水。

Supper Moment四子透過拍片交代心聲,一開始他們扮嬲拍枱,笑言「點解要話修哥!要話我哋呀」,Sunny及阿雞以黑色幽默發言:「食飯啦,有飯好食啦!啲飯仲暖,定人情冷暖呀?」阿達更搞笑說 :「呢啲係真飯,唔係電視啲飯(唔係道具)。」阿雞反問:「邊個電視台?咩電視台我都上噃!」

Sunny夾住一嚿魷魚,意有所指說:「呢條魷魚都潛咗水好耐。」CK解釋這兩年幾的時間都在做音樂,不明白為何代表潛水,阿達接着說:「你唔好將個人生剩係放喺social media。」講到網民不停鬧他們時,連已故經理人Gary都被鬧,四子表示 :「鬧我哋冇所謂,做人要有同理心,唔好鬧Gary,發洩還發洩,有好多嘢係我哋自己知,我亦都唔需要話畀大家知。」

Sunny:搖滾都背叛埋

阿雞坦言當去到憎恨地步就是對人不對事。Sunny表示:「我覺得我哋一直係用時間去證明一切,當我哋初出道,我哋去跳彈床表演,當時都冇人明,為乜有捷徑唔行,係要行咁多艱難嘅路,我哋做嘅嘢好多時都係對自己有交代,我覺得呢個緊要過同人哋有交代。」阿雞再說:「如果連自己都交代唔到,點同人交代 ?」

SM 講到「初心」,外間指摘他們對唔住《無盡》這首歌,對唔住夢想及音樂, 是「搖滾叛徒」。CK說:「搖滾叛徒呢個名,好耐冇聽人用過……」他反問:「搖滾精神係甚麼?係反叛?係一定要反一啲制度?其實鬧我哋『搖滾叛徒』係另一種稱讚,係好事!」Sunny再說 :「 一句講晒如果我哋連搖滾都背叛埋,咁!真係冇人夠我哋搖滾!哈哈哈!」

提及網友鬧他們默不作聲就是「潛水」,阿雞笑怨阿達:「叫咗你唔好成日玩潛水㗎啦!」阿達苦笑說:「我係玩水上活動,但係我冇潛水,我一直喺水面!」遭三子即場夾攻玩他 :「你又唔post出嚟,你又唔講!邊個知你去咗邊呀。」

唔啱口味有冇罪?

提到網民指他們北上搵食,阿達問:「2019年我哋喺邊度出騷?」CK即答:「內地!內地!內地!唔係咩?」Sunny誇張大笑:「只係去內地,跟佢哋啲comment,所有都去內地。」CK數他們到加拿大及日本出騷,去巴塞隆拿做宣傳,美國錄音、台灣宣傳國語新歌拍MV,CK續說 :「真心講,要明就明,雖然呢句好廢,但係做音樂唔係大家諗咁短時間,花咗好多時間做一隻新碟出嚟,話X你新碟唔X貼近社會議題,唔係講緊大家而家想聽嘅嘢。」阿達批評:「諗住畀大家一啲新感受,你哋係鍾意聽啲舊嘢。」

Sunny 再解釋:「但係如果啲嘢真係唔係啱議題,唔啱大家口味,音樂有冇罪?冇罪㗎,我都有自由做自己想做音樂。」阿雞指若果首歌不是說他們內心的事,不要聽便可,CK拍晒枱講:「佢哋係期望緊你唱嗰啲嘢,但你唔係唱佢心目中嘅,而家就X你。」

被罵「搵人仔」

Sunny指有人鬧他們「搵人仔」,阿雞搶答 :「港幣、美金、加紙都唔搵,剩係搵人仔,哦!」Sunny收起笑容 :「其實大家可能忘記咗做音樂真係要錢,做每張專輯,演唱會製作都好需要錢,令件事upgrade,我又諗起好耐以前啲人嘅價值觀係覺得樂隊係唔應該搵錢,樂隊有商業價值就會被標籤係『搖滾叛徒』。但冇錢點錄音?人係成日困咗喺自己價值觀,但有冇諗過啲標籤未必係真!」

玩音樂被標籤

Sunny稱這兩年體會更深,覺得玩音樂這條路不容易走,好似《無盡》歌詞一樣,去到某一階段就有不同標籤,「誰又能鑑定你的醜惡與美好?」阿雞指並非講出來才叫有「態度」,CK認為態度就是放在音樂上:「有乜X嘢,你聽囉,真係有人明,有人會私下寫。我哋四個都有溝埋大家態度落去,如果你一開波反枱,講粗口X晒老X咁,End up會係點呢,唔使傾啦,如果係X晒先嚟聽你,我使X聽你做音樂咩。啱唔啱呀?」Sunny稱他們花了太多時間做音樂,不懂玩Social Media來經營「形象」,更即場玩自拍。

網民:要修哥降格去九展

之不過網民對於SM開騷,網民評價好壞參半,有網民撥冷水,重提今年4月SM去TVB節目跟胡楓(修哥)jam歌,唱《舊歡如夢》、《我的親愛》與《紅日》,好奇問:「會唔會有修哥Moment?」另有網民紛紛留言「由紅館去返九展都啱嘅」、「要修哥降格去九展唔尊重。返CCTVB一廠咪算囉」、「想睇吓仲唱唔唱《無盡》」、「2場呀?MIRROR都係6場咋」、「過唔到關睇佢哋個大灣區演唱會喎」等。

同時有死忠樂迷鼎力支持Supper Moment,期待等開Show睇晒兩場,「有你有我,九展見」、「支持繼續做好音樂畀大家」。樂迷眼見RubberBand唱《漫長》、ToNick推《好想拯救地球》、KOLOR推出《進退》、Dear Jane唱《銀河修理員》,不知Supper Moment今年會出甚麼歌呢!?

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner