盧覓雪生日收P圖相開心到跳起:我覺得自己好似小甜甜

更新時間 (HKT): 2021.05.28 16:32

資深傳媒人盧覓雪早前與藝人朱庭萱出席港台《視點31》就兩大電視台近來鬥綜藝、鬥娛樂作出辯論,雪雪全程表現冷靜,壓倒性擊倒玻璃朱論點,贏得網民友一面倒的讚賞。其實早在宣傳海報推出的時候,有不少人取笑宣傳相上的玻璃朱「P到外星人咁」,而盧覓雪卻用真面目示人,結果杜汶澤出手將雪雪的相片P成「蛇精女」,出post為好友打氣!

今日雪雪在社交平台出post:「Happy Birthday to me!30幾年來第一次慶祝生日!仲要係直播緊節目嘅時候張部長攞住蛋糕衝入嚟!仲有我嘅首張靚靚P圖,同埋我好朋友林海峰為我彈奏一曲(作狀),我真係姣Kai心!#張P圖笑死我」原來今早雪雪如常主持《在晴朗的一天出發》,在節目接近尾聲的時候,大家為雪雪送上驚喜!

張部長笑稱知道雪雪已經有30年沒有慶祝生日,雪雪笑說:「本來我舊年諗住慶祝生日,但係因為疫情而取消咗,多謝張部長,濃情厚意!」聽到雪雪形容生日蛋糕的模樣後,林海峰冷冷地說:「我好少唔同意你嘅,但係我覺得呢啲形容詞比較普遍啲,我覺得呢啲蛋糕行落旺角大把!」擺明寸玻璃朱當日批MIRROR「行落旺角大把」的言論!

不過驚喜又怎會只得一個,張部長突然又拎出一張「魔鏡」,雪雪收到後開心到跳起,因為相中正是雪雪首張靚靚P圖:「我第一次見到自己P圖個樣呀,真係呀,我唔識P圖,又冇嗰啲P圖apps,我覺得自己好似小甜甜呀!好靚呀!真係超級迷人,我好高興呀!」林海峰問雪雪的生日願望,她笑說:「我嘅生日願望其實30年都冇變過,就係世界和平,身體健康!」林海峰笑說:「30幾年世界都唔和平?友誼第一,比賽第七!」雪雪又說:「係喇,我遲早都係167,開心咪得囉,人生有乜嘢追求呀,最緊要開心。」

後來谷德昭亦有致電到直播室祝賀Michelle:「恭喜發財呀!身體健康呀,妳記住要頂住呀,大家都靠妳嗰句『早晨呀』過活!畀心機練嘢喇,我見你擺嗰個戰鬥裝越嚟越有機會拍《葉問5》!頂洪金寶個位呀!下次你上節目唔單止可以傾,仲可以開live打!」潘小濤打電話加入戰團說:「生日快樂呀,我係P濤呀,祝Michelle橫掃晒港九新界嘅所有擂台,KO晒所有對手!」之不過小濤的對話有點「見外」,搞到林海峰忍不住說:「今日嘅節目畀你搞到好精采呀,你一出現個生日會畀你搞到高潮位,啲蠟燭全部溶晒,蛋糕都差唔多變成一PAT,令到Michelle一世都記得你,喺個炎熱天氣底下,都感覺得個冷場,成個香港都凍咗幾度,靜晒呀,真係未試過,你嘅功力士真係越嚟越深厚喎,你除咗摧毀個節目之外,仲差唔多摧毀咗個廣播機構,畀你個冷場摧毀晒!我哋都想多謝你呀,不過嗰啲說話留番咪後先講得!你明架喇!」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner