《二月廿九》續集一褪再褪或無緣台灣取景 如期下年2.28播

更新時間 (HKT): 2021.05.28 00:03

今年ViuTV五周年,之前在社交平台開始了「今世做電視系列」幕後花絮專訪,之前已經訪問過《Chill Club》及無制限OT編集團,昨日(27日)終於上載了去年話題作《二月廿九》的幕後訪問。

節目訪問了《二月廿九》兩位功臣——監制及導演羅嘉駿(Steve)、編審黃智揚(Yellow)。直至上月仍為續集《940920》開第6X次劇本會議,Steve自認麻煩:「我自己都知,有時我諗到啲嘢好靚,但連唔到上文下理,佢哋就要幫我串返起嚟,會諗到好痛苦。」Yellow形容拍檔:「佢以影像同效果行先,好容易忽略咗人物同劇情。」Steve即笠高帽:「要完整寫到咁多集劇本嘅人,佢係一個配合度極高嘅編劇,冇佢嘅話可以話冇《二月廿九》,我都做唔到導演。」

Steve在訪問中介紹漫長的創作過程,由故事大綱起草,老細過目、批准,搵編劇埋班,擴展成分集大綱,可能已經需要30次會議。之後再要寫每一集分場,由編審整理、導演過目,待分場確定再寫每場劇本,一切齊備後才可正式開拍。ViuTV總經理魯庭暉轉發訪問時,亦兜個圈讚團隊出色:「呢個系列成件事由提出要做,諗點做,同做,都係digital team 自已幾條友搞嘅。佢哋係咁意象徵式叫做拍之前問咗我一聲我就只需要等睇片。本人份工,輕輕鬆鬆。」

導演羅嘉駿:電視台有責任提升作品質素

《二月廿九》被形容為ViuTV神劇,Steve的團隊在調色、配樂都有花心思,尤其在劇本,Steve說:「同典型港劇可能會唔同,情緒同畫面我哋會擺多啲心思喺鏡頭上面,劇本上會用三角形去標記畫面,每行三角形都要用一個鏡頭去拍。」Yellow則說:「有啲嘢唔係靠講出嚟,情緒、心聲嘢,好多港劇都會講出嚟,我哋用行動去代替,盡量貼近返我哋平時嘅行為。」

劇集出街前,Steve原來沒有沒有太多信心,播出後有口碑,但他卻說:「質素未到最好,坊間覺得好,我哋覺得可以提升。」他又說:「我哋個種黐線同Mike導唔同,我哋黐線係不計較,可以24小時通頂,做多好多步,可能只係想提升1到2%。」、「係挑戰緊觀眾,電視台都有責任令作品質素提升,不停帶新嘢畀觀眾睇。」

之前續集《940920》打算到台灣取景,不過起行日子由一褪再褪仍未成行,現時台灣疫情嚴峻,相信再次延誤到行程,《蘋果》聯絡過Steve,問到會否改期或改變計劃在香港拍攝,他說仍在討論中:「仲討論緊,呢兩日會有決定,我會喺IG出post講。」他又透露《940920》播出日期仍與之前預計一樣:「下年2月28號播,如無意外的話。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner