玻璃朱呻撐警冇晒工作 
盧覓雪幽默代出頭「幫你鬧廣告商」

更新時間 (HKT): 2021.05.28 02:00

港台節目《視點31》原定大前日下午邀請資深傳媒人盧覓雪和撐警藝人朱庭萱(玻璃朱),就無綫和ViuTV在綜藝節目方面開戰進行直播討論,惟港台「急轉軚」改大前晚8時播出首七分鐘,遭網民狂轟,直至前晚才有30分鐘足本版睇,雪雪全程表現冷靜,壓倒性擊倒玻璃朱論點,連網民友亦一面倒大讚雪雪。

世界跟紅頂白

節目中, 玻璃朱大呻藍營藝人受打壓︰「我自從撐警後,所有job冇晒!因為搵我哋就會被人打壓,鬧啲廣告商。」雪雪乘勢反擊:「我要幫你鬧啲廣告商,你見黃嗰啲好堅實,邊間慘就全村人排隊『懲罰』佢,點解藍營嗰啲又唔去『懲罰』吓撐藍嗰啲人㗎?」玻璃朱辯稱:「因為藍營人鍾意低調和平,我哋只係想搵食!」玻璃朱並為月初曾狠批MIRROR「呢啲樣行落旺角大把」道歉:「對唔住,我對MIRROR一啲反感都冇!奈何報道某啲位係反感。」雪雪即笑問:「當年你有冇嬲譚詠麟同張國榮霸晒啲娛樂版?世界就係跟紅頂白。」

玻璃朱指落廣告需要靠收視率作標準:「全世界都用緊,唔明點解突然唔buy!」雪雪反擊:「用緊舊制度去對應新時代係不合時宜,ViuTV係好低收視率,但條片好多人share出去,數字好龐大。」其後玻璃朱踩ViuTV節目:「節目(《ERROR自肥企画》)低俗到朋輩欺凌,最驚細路仔,我又擺個波去炸吓佢下體先!」雪雪指這是懲罰性的遊戲節目,每個人都有機會受罰,不存在朋輩欺凌。兩人在尾聲時你一言我一語,玻璃朱不斷指藍人被「網絡欺凌」,雪雪解釋︰「因為佢哋年齡層太大,唔識網上世界。」又說︰「你話唔落我廣告就係欺凌我,喂!黃嘅人都同樣受欺凌吖嘛。」

網民大鬧野蠻

不少網民大讚雪雪︰「發言質素高過隻玻璃朱千萬倍」,又指玻璃朱野蠻︰「唔落廣告就叫欺凌,都幾打橫嚟。」而KOL「伍仔」伍博頤在個人頻道中就嘲笑玻璃朱︰「佢開口夾着脷,九唔搭八,又問非所答。」對於玻璃朱指:「我覺得TVB其實進步緊!」100毛fb昨帖文讚雪雪:「你以為《視點31》係講認真討論各種議題?少年,你太年輕了,查實佢係一個教你如何保持笑容嘅節目。當你面對緊一個Xuo界世界級人士,只要個頭keep住斜十幾廿度、對眼保持一個看似有焦點、但其實唔係望緊對方嘅視線,再露出一個尷尬而不失禮貌的微笑,咁就pefect池啦!」

娛聞樂陪你走遍全球追星,即Like「娛果」FB 專頁!
BannerBanner