193粉絲豪花10萬落廣告谷新歌 「老婆」心聲:佢威我哋就開心

更新時間 (HKT): 2021.05.28 18:13

193(郭嘉駿)最近推出新歌《睡到三點》,在YouTube上載10日點擊已有約97萬,有望衝破100萬。193一班fans「老婆」為幫偶像造勢,由今日起到6月中,推出三個應援活動,包括在九龍及新界的20個巴士站燈箱落廣告;又於銅鑼灣、旺角和尖沙嘴的大電視,每小時播放8次的宣傳廣告;最後會在6月5日(星期六)下午1點至3點,於銅鑼灣Sogo對出安排雪糕車派雪糕,盡求港九新界都見到193的蹤影。

對於「老婆」的貼心表現,193今日以短訊回覆《蘋果》表示好開心,他說:「其實都幾多宣傳,有巴士站廣告、大電視播MV,仲有雪糕車宣傳,都多謝佢哋,嘥呢個錢嚟幫我宣傳新歌,希望攞多啲好嘅成績,暫時差唔多100萬點擊,希望點擊更加多啦!有好成績公司先會畀多啲資源我去再做歌,同埋加埋Fans今次幫我嘅宣傳,希望首歌可以上到榜啦,例如chill club、叱咤、港台、新城之類,希望可以上到榜啦。希望今次宣傳係有效,唔好嘥咗fans嘅錢,多謝佢哋為我畀呢個錢,以我理解佢哋每人都唔係畀好多嘅,應該都多人夾,每人夾幾嚿水至一千蚊咁,其實我都係估㗎咋,我都唔知。」

唔會同姜濤比較

193的氣勢直逼MIRROR人氣王姜濤,IG followers有36萬,比姜濤高出約7萬,真正如193所願,做了ERROR旳姜濤。而姜濤早前生日,他的fans豪花逾50萬炮製八大驚喜,問193會否希望超越姜濤?他說:「希望我累積更多fans嘅時候,下一首新歌有更大嘅宣傳,好似姜濤咁啦,但絕對唔係同姜濤比較,我啲fans都同我一樣,大家都同一間公司,邊個好大家都開心,大家都想大家好。咁當然我現在啲宣傳點都唔及姜濤,佢啲fans宣傳真係鋪天蓋地,誇張過我100倍,又電車,成個銅鑼灣都見到佢,但我都好感謝我嘅fans落廣告,其實落一個我都好開心㗎嘞。印象中我對上一次fans幫我落廣告,係剛出道兩、三個月嘅一個生日廣告版,多謝我班fans,有啲真係由《全民造星》出道已經跟我同支持我,同埋多謝新一班留意我嘅觀眾,新舊fans群要相處得融洽啲。」不過,193避免造成混亂,所以不會落區會合fans,只會遠望打卡。

人氣勢不可擋,193透露最近每日都好忙,睡眠嚴重不足,但仍然好開心,他續說:「我最近忙緊客串套戲、ViuTV節目,同埋唔少廣告啦,仲有時裝雜誌嘅宣傳,個期full 晒。記得年幾前真係有兩、三星期冇工開,現在就算攰都攰得開心,因為賺錢,好感恩,終於可以做到唔放假嘅藝人。」

193粉絲想偶像「威威豬」

《蘋果》今日亦聯絡193的fan club admin KY,透露今次宣傳費花大約十餘萬,由約300位fans集資而成,她說:「主要係想193多啲人認識,雖然而家都好多咗人識,但佢威威豬,我哋就開心㗎喇!」問到最喜歡193邊方面?她說:「高大靚仔、講嘢夠真、轉數夠快,佢仲係真心好錫fans。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner