楊思琦生白頭髮有鬼祟肉 出海玩Wakesurfing似30歲想做想試

更新時間 (HKT): 2021.05.29 00:30

43歲的楊思琦畢業做過實習老師後,參加完港姐後便一直於娛樂圈發展,轉眼間變中女,但外表仍然保持得宜,聽到笑話仍然嘻哈大笑,一點老態也沒有。

最重要初心不變,對感情事仍然低調。9年前楊思琦未婚產女,與「空心老倌」吳帥分手後一直做單親媽媽,2019年宣佈再度懷孕陀有男B,並表示已嫁圈外老公,丈夫身份從未曝光,一對仔女都跟她姓,外間取笑她有虛擬老公,難得她仍然笑得出,輕描淡寫:「畀啲空間我。」

不理會世人眼光,從不晒幸福,楊思琦覺得自己開心便足夠:「唔會係虛擬,如果唔係點會有小朋友?佢覺得舒服就唔強迫佢,人哋話虛擬,我覺得開心就OK,佢怕醜。冇做呢行業,佢諗法係覺得唔好搞,有人追住冇自由,我順得人就冇乜所謂,適合就得。」她強調沒有刻意避忌,一家人也會經常出外玩,但很多時訪問,楊思琦不會主動提及丈夫,追問下都不願多談。

她從不着重年齡增長,只重視心態要保持年輕:「我仍然心態後生,仍然20、30歲思想,有啲乜都想做想試,而唔係因為自己年紀年長而卻步,想試新嘢。」她說早前第一次跟朋友出海玩Wakesurfing:「我人生第一次,試咗好好玩!睇片睇人滑浪好難,我只會喺泳池游水,係生完仔後想試,我覺得抽多啲時間畀自己嘗試,吸吓新鮮空氣。」隨着年紀增長,會生白頭髮,亦開始有「鬼祟肉」,想展開做運動計劃,使身形更好:「都想fit返啲,想體力、整副機械後生啲。」她取笑自己也開始有老態,現在湊仔要爭取時間午睡,跟小孩一起爭取時間休息。

早前她為拍攝ViuTV新節目《中女唔易做》,嘗試貼地生活,日打兩份工作,逼巴士、趕港鐵,日日做足8小時。她接受訪問時坦言已踏入中女行列,自覺體力大不如前:「要走上走落,有次喺太子站行到氣喘,好攰。」分別試過做4份工:整台式飲品、花店店員、賣生果、派傳單,拋頭露面並不介意,可惜有時要受氣:「派傳單好考EQ,派傳單對象有時反應預計唔到,有啲人受完壓力委屈,向你發洩吓,眼神、言語、動作上會有啲粗魯,要抑制自己唔好因此唔開心。」在花店打工也要體力勞動,有時要搬重貨,但因此學識插花,閒來在家也會插花粉飾家居,令她的家人也很開心:「家庭成員會讚,件事令佢哋好開心,媽咪冇見我整過,阿女見到讚好靚,佢好有興趣。」

服裝提供:Perme

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner