【娛樂人物】歌聲勉勵年輕人 
小肥視香港為家拒移民

更新時間 (HKT): 2021.05.29 02:00
■早已視香港為家的小肥,面對最近的移民潮,他表示根在香港,暫時沒有移民的打算。

小肥(徐智勇)日前在旺角接受《蘋果》專訪,提到近日推出新專輯,他興奮地說:「嚟緊隻新碟籌備經年,同陳輝陽傾咗一個下晝,決定出十隻歌嘅翻唱碟,留意,係十隻歌先。大多數呢啲翻唱發燒碟,都係揀自己鍾意嘅歌,但係我哋唔係由自己出發,而係縮窄到由2010到2020呢十年嘅歌,係特別想送畀香港嘅年輕人,勉勵又好、叫佢哋繼續堅持又好啦。陳輝陽由選曲到編曲,都有想交代嘅訊息同故事。」

唱《嗚》感動飲泣

小肥自爆錄碟的過程,雖沒有刻意聯想過去十年香港的光景,但亦被歌曲深深感動,更唱到飲泣:「有幾首自己都特別有感情,其中一首係小塵埃嘅《嗚》,呢首歌完全代表2019年,大家返去聽吓,個音樂好輕快,但係啲歌詞好悲壯,係好大嘅反差。」

回顧過去十年,最以光速改變的一定要數前年及去年,小肥坦言經過疫情考驗,讓他更享受工作的忙碌,以及懂得珍惜眼前人:「好多突然嘅生老病死,如果去到呢刻你都不知珍惜,返去瞓覺啦。」 香港人面對的歷練,又豈止疫情?小肥早已視香港為家,面對最近的移民潮,他說:「移民,我有輕輕諗過,因為我有葡籍,要走只變賣物業就得。雖然我唔喺呢度出世,但係我都當咗呢度係我屋企,我兩個家姐同阿爸阿媽都係香港人嚟㗎嘛,尋根嘅話我都算係香港人。身邊好多朋友眨吓眼就移民去英國。走唔係問題,我覺得係每個人嘅選擇,我暫時嚟講都選擇唔走囉。」

採訪:盧妹

攝影:仇志德

場地提供:EØN

化妝:Yen Lai

造型:Patrick Ho

娛聞樂陪你走遍全球追星,即Like「娛果」FB 專頁!
BannerBanner