林敏驄被爆開工「欺凌」新人 193直認有壓力

更新時間 (HKT): 2021.05.30 00:00

組合MIRROR的盧瀚霆(Anson Lo)和ERROR的郭嘉駿(193)近日人氣急升,二人由樂壇踩入影壇,兩人近日合作新片《假冒女團》,電影由ViuTV劇集《地產仔》的徐梓耀執導、Charlie Wong監製。《假》片講述有一間經理人公司利用招冒的女團去做欺詐,Anson就被派入去做臥底,所以他要男扮女裝混入做女團成員,而193就做一名很mean的導演。顧名思義以女團為主線,當中團員有Super Girls的李靜儀(Heidi)、《全民造星III》的參賽者李炘頤(Alina)和陳葦璇、蘇皓兒和電影新人陳紫萱等等,一班青春面孔非常養眼,林敏驄就扮演女團的縮骨老闆。

劇組日前在大埔拍攝一場歌舞演出,由星級排舞師Sunny Wong負責設計舞步,為求效果理想,女團埋位前都不停綵排,在台上載歌載舞,Anson雖站得較後,但他是唯一男生,特別顯眼,站在最前的陳葦璇表現自信,早前排練弄傷頸椎的陳紫萱則戴着頸套保護。劇情講述林敏驄去監場,獲幾個女團成員冧爆,對於下屬不合心水的工作表現,林敏驄大發雷霆掟爆谷發脾氣。

男扮女做臥底

Anson透露不介意在戲中男扮女裝,他表示混入女團做臥底的角色很好玩:「呢個角色係我人生第一次同咁多女仔合作,未試過組女團,同男團都幾似,感覺好似韓國嗰啲女團。我哋都跳開舞,大家排得好開心。」問到Anson可覺大家已當他做「姊妹」?Alina已搶答:「我哋幾個都好男仔頭,應該佢當我哋係兄弟呀!」畢竟這是Anson的處男電影,他賣口乖說:「戲內戲外,大家照顧我多啲,可能我都比較新,大家都照顧我。」蘇皓兒則說:「大家合作愉快,大家互相提點。」

一班青春派開工期間為大家帶來不少熱鬧氣氛,大家對前輩林敏驄都敬重有加,片場都叫他做「大師」。62歲的林敏驄與台前幕後打成一片,他的年齡層頓時被拉低,林敏驄即搞笑說:「邊有呀!我不嬲都咁上下,不嬲都有活力呀。」近日林敏驄在社交網貼出的相片都大玩P圖回春,又自嘲叫「驄B」。林敏驄又不時改對白整蠱對手製造笑料,他睇playback時,坐身邊的導演徐梓耀突爆料:「新人演出時,單方面被欺凌蹂躪。」此話擺明把矛頭指向林敏驄,徐梓耀指林敏驄跟一班新人在片場擦出火花,林敏驄對被取笑「蝦」新人,他搞笑回應:「冇呀,我對啲女就攬住係咁錫,仔都一樣。」

性格直率的193坦言跟林敏驄做對手戲時有壓力:「驄哥係好即興跳脫嘅人,同佢夾戲有啲困難,因為佢好即興,我唔係超即興嘅人,佢好有趣,同佢夾得好開心,演員見佢好開心,佢可以帶動大家relax啲、輕鬆啲,雖然同佢合作有壓力,佢太放鬆,我太繃緊,今套戲同佢得一、兩場對手戲,已體驗到,希望以後再多啲機會同佢合作,咁就不得了。」其實林敏驄跟一班後輩有講有笑,他再說:「我見到花姐就開心。」更笑言下次開戲要同花姐做對手戲。

搣手指忍笑

蘇皓兒指跟林敏驄對手戲時大考執生技巧和忍笑能力,她謂有時要暗暗搣手指忍笑:「大師好多爆肚,同佢拍真係要忍笑,要『咪』住隻手指,怕忍唔到笑接唔到招,怕影響到大家。」如果想忍得到笑,林敏驄抵死說:「啲女跟我返屋企培訓10日,Anson Lo就返屋企等消息。」Anson連消帶打林敏驄及眾女團:「大師私底下話我都好抵錫,你哋(問女團對手)話我唔抵錫咩?」

陳葦璇謂那場跳舞戲令她重拾青春感覺:「好耐冇做可愛動作,成大班女仔一齊做返,令我感覺自己返去18歲咁,而家唔講自己幾歲喇!」Heidi都認同有熱血感覺,她大讚每次來開工,劇組都準備了好多零食,眾女都受不住引誘,Alina擔心:「最尾變咗個波。」負傷開工的陳紫萱則多謝大家關心她的傷勢:「Anson Lo同我眼神交流時,佢第一眼往往望住我個頸圈先。」《假》片當日休息時,工作人員推出蛋糕,大家更為監製Charlie慶祝生日和唱生日歌。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner