專訪丨梁嘉琪賣衫講原則 戶口曾剩3位數感激王祖藍打救:一世嘅朋友

更新時間 (HKT): 2021.05.31 00:30

梁嘉琪入行18年,做過女一,又是《學是學非》的元祖級「是非精」;但前年疑因政治立場遭TVB雪藏,演出機會暴減,終在2020年3月約滿離開,結束13年賓主關係。嘉琪日前接受《蘋果》專訪,淡淡然說:「約滿囉,大樹資源真係好多,機會好好,但我從來唔係一個好定嘅人,想不斷有新衝擊,發現,嘩,自己攞咗10年金牌!Timing覺得唔再離開等幾時?都冇咩輸啦,我又唔係啲乜。」

所謂「瘦田無人耕,耕開有人爭」,神隱一年的嘉琪,早前為港台主持文藝節目《周末八點半》,又幫香港開電視主持新節目《關於早餐的一些事》,最近更盛傳獲好友王祖藍力邀回巢,她沒好氣道:「唔好睇小我嘅自主權,其實我好任性同自我,決定離開去邊、做咩節目,唔會因為任何人(而改變),屋企人同經理人都左右唔到我。」

中六合彩畀晒嘉琪

不過,嘉琪承認與祖藍是識於微時的好朋友,中學時期已一齊玩話劇,後來大家都考上演藝學院做同班同學,跟湯駿業成為「三劍俠」。三人之間有心領神會的默契,她說:「我離開有線係裸辭,隔一段時間先入TVB,但唔係即刻出糧,我嘅銀行戶口得返3位數,佢(祖藍)打救咗我。」她表示毋須開口問借錢,朋友已伸出援手,這份恩情讓她銘記於心:「我哋真係好friend,我、祖藍、湯駿業同杜雯惠,我係唔使問,佢哋眼見到,我係窮到呢……但我係唔會出聲嘅人,佢哋會成日嚟接我放工、車我返屋企、請我食飯,呢啲朋友無論發生咩事都係一世。當年我哋仲夾錢買咗一期頭獎8千幾萬嘅六合彩,佢哋話不如每人夾10蚊,跟住真係中咗,但千幾蚊啫,佢哋全部畀晒我。」被取笑是否夾埋「扮中獎」,嘉琪蹺住手笑說:「如果唔係真中,咁千幾蚊真係唔得囉!哈哈哈!」

嘉琪是朋友堆中年紀最輕,大家都當她是妹妹,她續說:「以前仲後生,大家會互送生日禮物、聖誕禮物,過多一兩年,佢哋會話『我哋呢啲老人家,唔好買嘢嘞,畀利是啦!』又係記一世,仲有Mimi(羅敏莊)。正正因為我哋嘅友誼係base on以前,所以我哋唔會講呢啲,我哋係有一個默契同共識,無論祖藍定湯駿業,風車草(劇團)依家都非常成功,如果我要所謂搲撈,我絕對係要佢兩位畀嘢我做啦!但我哋好friend,知道唔好越過呢條線,唔係(友誼) 會變質。」嘉琪自言是一個沒有物慾的人,現在懂得積穀防饑,最艱難時期總算過去。

獲余詠珊賞識加入有線

談到另一位「伯樂」余詠珊(Sandy),原來與嘉琪只是點頭之交。當年嘉琪與李佳芯、黃翠如都是從有線過檔無綫的三小花,備受力捧,「我感受唔到有人覺得我係,又冇感受到所謂眼紅。但無可否認,當初我入Cable做娛樂新聞台,係Sandy揀我入去,但入到TVB,佢應該唔係管戲劇,我呢啲小薯茄真係唔知。」無可否認,嘉琪初入無綫機會比別人多,除主持《學是學非》,還加入劇組作雙線發展;09年首度拍劇,在《學警狙擊》演花若葆(藥煲),但遭受好多抨擊,「第一套係最多,覺得你讀過演藝呀,啲戲咁樣嘅?但又係事實,因為電視同舞台劇係兩個媒體,有人會覺得好誇張,諗住畀盡力去啦,但咪就係多咗,有啲力你多咗就係多咗,同埋嗰時係冇自信,even到現在都係,成日覺得呢行啲人太叻。」

首個早餐題材節目

嘉琪願意接受批評,慶幸還得到好多前輩的鼓勵,及得到監製繼續重用,「其他監製會話『喂,唔好掛住諗之前啲嘢,總之你而家收到呢個劇本,就要好好諗呢個角色係點』。真係最老土一句,無論主持同演戲,一樣咁鍾意。」近年嘉琪專注主持方面發展,與嚴崇天合作主持飲食節目《關於早餐的一些事》,「冇正式統計過,好似係有史以來第一個齋講早餐嘅節目。我就無論幾點起身,第一餐都叫食早餐,哈哈。」她表示特別喜歡做人訪,透過做資料搜集,可以了解更多別人的故事,「有一集天未光就去二澳,見農夫好辛苦種稻米,發現香港好多土地未有人開荒。日本米幾貴都好,仍要經過真空同冷藏;香港米細粒,但香啲,好多人想支持香港人嘅農業,要好好幫佢哋宣傳。」

講原則賣衫唔鬥平

回復自由身,嘉琪沒有放軟手腳,幕前以外,還積極發展網店sell自家設計的靚裙。訪問當日,記者到訪其位於尖沙嘴的小貨倉,面積僅200餘呎,擺貨之餘,還要僻出一個角落做直播賣衫,雖然辛苦,但卻樂在其中。「我一向想做生意,開過韓式小食店、賣首飾,但敵唔過香港小店天敵——租金,未回本已經蝕錢。前年跟一位設計師朋友合作,我主要負責影靚相放上網,但自問係一個唔稱職嘅宣傳人員,成日都唔跟schedule。」賺定蝕?她大笑三聲「哈哈哈」,然後說:「我哋目標係交到租,保住員工飯碗,咁就完!我同拍檔都冇正式出過糧,最滿意係創業攞咗5位數後,就冇再攞過錢,起碼未蝕。」嘉琪自言是一個好有原則的人,唔想鬥平搶客,又要保持品質,所以出貨量比同行少,「有同行問過我『係咪撈㗎』,好多人喺韓國攞貨,但我同拍檔覺得違背咗當初意願,好多香港女仔想着靚啲,但又要搵條遮到肚腩大髀嘅靚裙,我哋想做到呢樣。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner