林泳淘5.29嫁初戀男友 冧爆宣言:要愛到海枯石爛生命終結

更新時間 (HKT): 2021.05.31 12:38

前《東張西望》「東張女神」林泳淘(Wingto)日前跟初戀男友結婚,結束14年愛情長跑,恭喜晒!泳淘向來好保護另一半,她在社交平台上載的婚紗相,亦只能見到老公的大側面,但仍可看到他身形高大,側面亦相當俊俏,與女神十分匹配。

泳淘今日接受《蘋果》電話訪問,她開心笑說:「而家叫我林太,但我唔鍾意林太呢個名,有少少哽耳,所以大家都係叫番我泳淘啦!」她透露新婚踏入第二日,給老公滿分,她說:「叫佢林生得喇,我覺得佢可以攞爆分,我都驚佢囂張,所以好難畀分,覺得佢已經係畀唔到一個分數,可以畀幾多就畀幾多。點解冇正面相?遲啲遲啲,未post到啫!」

她原計劃到外地結婚,但疫情關係只好作罷,待疫情過後才會舉行婚宴,由於觀禮人數限定20人,撇除家人和律師,就僅能邀請少數親友出席,但過程卻很感動浪漫,她說:「簽紙嗰刻好冷靜,但一開始講誓言就喊,不過,我老公好冷血,仲喺度恥笑我啲friend個個喺度喊。」問到會否一心一意做少奶奶?她說:「我從冇諗過做少奶奶,香港生活壓力大,唔可以結婚就將壓力轉移畀另一半,咁好唔公平嘅!反而結咗婚,大家組織家庭,應該要一齊去努力,如果將來有小朋友,佢就再努力啲啦!我哋對生仔好隨緣,社會環境咁,都唔急。」

車禍促成婚事

泳淘今日亦在IG發表新婚宣言:「對於新嘅身份, 我仲係無乜實感, (努力執屋中) 不過林生就好開心, (幸福mode執屋中) 話說大約係一年前, 我同林生因為輪流炒車, 我就帶咗佢去拜拜還神(感謝神,最緊要人冇事)) 師傅見到我哋個八字就話, 哇,你兩個人真係天作之合, 個八字咁夾嘅, 有冇諗住結婚呀? 林生就好爽快咁話 : 有呀!

呢次係我第一次聽到自己要結婚嘅事, (事後先知,原來佢之前已經訂好戒指,只係疫情關係一直卡住喺外國成年幾都未寄到返香港) 跟住師傅好快就畀咗兩個日子我哋,而其中一個,咁啱就係我哋嘅拍拖紀念日。(一切都是整定的) 2021年5月29日 我同林生都多了一個身份 多了一些家人,多了一份責任,但不變嘅係, 我哋應該會繼續相愛相殺直到海枯石爛, 直到生命終結, 直到永遠永遠。」

現年31歲的林泳淘原名林冬冬,曾以藝名林熙出道,是組合Lacee Lacey成員;後來參加2012年度香港小姐,落選後成為TVB合約藝人,曾擔任《東張西望》主持及J2《三日兩夜》,憑好身材及正義感成為宅男女神。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner