見證深水埗發展貧富兩極化 
吳鎮宇為低下層發聲 激動爆粗

更新時間 (HKT): 2021.05.31 02:00
■鎮宇日前受訪,坦言戲中角色似被遺棄,又轟政府的清場過程是人為錯誤,但政府只肯賠錢拒絕道歉。

吳鎮宇新戲《濁水漂流》將於周四上映,他在戲中與李麗珍、謝君豪等飾演露宿者,於一場無預警的清場行動下,盡失家當,鎮宇堅持向政府追討一個公開道歉。其實新戲題材是以真人真事改編,源於2012年深水埗通州街的清場行動。鎮宇日前在九龍灣接受訪問,為露宿者發聲,怒斥政府只願賠錢卻不肯道歉。

鎮宇飾演剛出獄兼有毒癮的露宿者「輝哥」,不但要貼地演出不停爆粗;當中他的幾句對白如「香港把X」、「政府做X錯嘢就要道歉呀!」更被指是不少港人的心聲。鎮宇過往曾在深水埗做暑期工,因此對此區別有一番情懷,對於社會低下層的一群遭到社會和政府的忽視及無助,他感同身受,希望藉着電影中精警及貼地的對白,為這些長期被無視的一群發聲。

清場過程人為錯誤

鎮宇表示自己沒有政治立場:「但我都覺得氣氛越來越唔好。戲中一班露宿者住喺深水埗,嗰區多年嚟係以低下階層為主,但近年嗰度反而不停起啲豪宅,起嚟做乜,真係唔明!」鎮宇越講越勞氣:「講我嘅角色係好似被遺棄,又冇親人,咁咪瞓街。喺清場執法過程,明明係啲人錯,但政府只肯賠錢唔道歉,輝哥條氣咪唔順。我從呢個人嘅角度出發就講咗句:『香港把X!』對輝哥嚟講所有嘢都係用體力去做,你諗吓香港點嚟?係咪大學生嘅建設?嗰啲官讀過乜大學,就係可以成為好嘅香港。但如果冇呢啲人去起樓,你攞100億出嚟,咁點起呀?呢啲人真係好慘!」

鎮宇還提到當中一句對白「老同係咪好X好恰先?」十分精警,他說:「戲中嘅露宿者被標籤為『老同』,係咪好好恰就唔使理佢哋先﹖第二句對白先係我最想講,就係『我哋呢啲瞓街係咪好好恰先,攞綜援係咪一定要跪喺地先,係咪因為你哋施捨綜援畀我哋,我哋就係咁樣先。』呢句就係我最想幫啲露宿者發聲,有頭髮邊個想做癩痢?」

右邊籠屋左邊豪宅

拍攝前有否親到深水埗考察?鎮宇說:「基本上我係深水埗人,因為有幾年喺呢區打暑期工,我跟爸爸做點心,每條街賣緊乜,有乜美食,我都知。有日我收工行一行,已經變咗鳥語花香嘅高級地方,有名校。如果你企喺中間,右邊係籠屋,左邊就係賣幾萬蚊一呎嘅地方,好似兩個世界。」

鎮宇指街坊街里的感覺最令他留下深刻印象,他亦不禁反問:「如果冇咗深水埗,香港會點呢?冇晒啲cheap人,全部都係中環、銅鑼灣靚人。」戲中輝哥堅持要政府就清場行為道歉,性格會否跟真實的自己很相似?鎮宇笑謂:「我唔知點講,堅持未必係好事,因為你堅持嗰樣嘢係咪百分之百係一件絕對啱嘅事,係冇人知道。」

娛聞樂陪你走遍全球追星,即Like「娛果」FB 專頁!
BannerBanner