獨欠謝賢丨胡楓率小生攻紅館 「仇家」曾江開聲尋人

更新時間 (HKT): 2021.06.01 20:38

已89歲高齡的胡楓(修哥)將於本月19日再踏紅館開騷,刷新他自己創下的最高齡演出者的紀錄。修哥今日約傳媒茶敍時透露,決意搵幾位「小生拍檔」齊齊攻紅館,今日獲曾江和Joe Junior出席,他們呼籲謝賢(四哥)一同演出,齊齊發起「搵四哥行動」。

他們又同聲表示:「搵到四哥唔會懲罰佢,錫佢都嚟唔切!呢位仁兄幾十年都係咁,鍾意的話唔叫都出現,唔鍾意就搵極唔見人。」修哥與四哥感情要好,但亦未獲對方接電話,湊巧早前有傳四哥身體不佳,Joe遂展示兩星期前在哥爾夫球會,見到四哥茶敘的合照,見四哥精神奕奕,Joe笑說:「我仲話四哥你咁fit,我都要學你一樣。」

曾江試唱被嫌走音

修哥希望安排4個小生同台獻唱,曾江笑言:「我啲歌有限,要早啲出聲準備練歌。」大家希望有開心氣氛,可能會演唱《萬水千山總是情》,曾江還即場展現歌喉哼唱幾句,「到時唔記得啦啦啦得唔得?」修哥就笑他有少少走音。而Joe則表示「𦧲飯應」,希望實現「四個小生去紅館」。

曾江和Joe與修哥情同兄弟多年,今次力撐今次修哥演出,修哥的曾孫將會上台演出,曾江豎起拇指大表羨慕:「我孫都未有。」Joe接住說:「我仔女都未有。」修哥則一臉幸福:「好開心,笑到合唔埋口。」

6年來未Re-U過

修哥、曾江、Joe Junior及四哥於2015年為大台節目《4個小生去旅行》宣傳時,謝賢竟當眾出手怒摑曾江,有傳是因二人積怨多時,也有傳是造假為宣傳,夾在中間的修哥企圖勸交不果,連眼鏡也飛脫,場面失控。原來自2015年後,4位小生未有重聚,反而修哥、謝賢、曾江卻偶爾聚會,獨欠Joe,他笑說:「因為我最年輕冇份,揸咪有我份。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner