ToNick門票秒殺放蛇捉黃牛 SM仲未沽清兼同網紅歌手Tyson Yoshi打對台

更新時間 (HKT): 2021.06.01 21:28

香港樂壇加油!最近演唱會市場再度焫着,早前MIRROR在九展Star Hall開騷一票難求,門票炒到癲價23萬元,呢期潮流興睇組合同樂隊,大家不約而同都揀喺九展開騷,好似啱啱唱完嘅樂隊KOLOR,同樣反應熱烈high爆全場,緊接仲有ToNick同Supper Moment,呢兩隊band都係排隊開騷,不過反應就各異!

ToNick將於7月3及4日在Star Hall舉行「HERE and NOW」演唱會,主題係香港製造,兩場門票已經售罄,網上出現黃牛飛,ToNick鼓手晨曦放蛇問價,有人以$2,400兜售兩張$680門票,聲稱是全場第一行,晨曦聞價後自揭身份:「咁貴,ToNick喳播,我係ToNick鼓手晨曦,就係你炒飛搞到大家買唔到,我會呼籲大家唔好買黃牛,你都唔好炒飛喇,做個清醒嘅人,入場睇我哋騷。」

Supper Moment開賣兩日仲未爆

ToNick在社交網cap圖留言:「音樂係用來治癒心靈,與其在資本主義中惡性輪迴,不如釋放自己做個清醒嘅人。唔好炒飛。」網民都讚晨曦:「放蛇都做埋,點夠你撈啊」、「晨曦超型吖!」、「賣黃牛d人真係好黑心,明明正常價錢做到嘅事要炒到咁貴!」晨曦接受《蘋果》訪問表示:「我哋真係籌備演唱會好耐,好想一直支持我哋嘅fans入場玩番一晚,因為近年大家都心事重重,對於我哋嚟講係一個大型聚會,但竟然畀我哋發現,有人買飛係諗住賺錢,我哋唔希望畀呢啲人混水摸魚,咁對歌迷唔公平,我寧願呼籲空咗個位,都唔好助長呢班人從中獲利,唔應該畀佢哋咁樣賺錢,希望大家自律。」

而Supper Moment同樣在Star Hall舉行兩場騷,日期是本月26及27日,惟門票開售兩日仍未沽清,出現滯銷情況,跟2018年紅館騷銷情差天共地。截至今日黃昏,兩場門票只有平飛$280售完,兩場貴飛$780仍有得賣兼任揀位,尾場中價飛$580仲有少量門票,日前Supper Moment拍片宣傳演唱會,反擊網民「搖滾叛徒」指控,結果卻惹來大量負評,網民湧到SM的官網狠批:「支持你哋轉戰大灣區」、「其實最差係你地條片嘅態度」、「音樂本身冇事,但有d嘢變咗質就係變咗質」,另亦有樂迷留言撐:「一直相信支持做好音樂」。

Tyson Yoshi有份同姜濤唱拉闊

另外,獨立歌手Tyson Yoshi宣佈將於6月25及26日在九展MUSIC ZONE舉行「HI I’M BACK」MINI LIVE,尾場撞正同樣在九展開騷的Supper Moment打對台,令SM可謂屋漏偏逢連夜雨!26歲的Tyson雖然冇大公司撐腰,但歌曲在網上爆紅,《Christy》至今在YouTube已有逾800萬點擊,連商台將於9月舉行的拉闊演唱會,演出歌手就是當時得令的4位新生代:姜濤、林家謙、Jer(柳應廷)和Tyson。早前Tyson接受訪問,他認為香港樂壇最需要有不同聲音,「我覺得要有人不斷去挑戰舊有嘅嘢先有競爭,正常情況底下,我覺得三年應該換一批新人,呢個market先健康。」Tyson宣佈開騷,吸引大批年輕樂迷力撐,有網民更問:「沒成年可以去嗎?」Tyson回覆可以。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner