播音皇帝李我出殯丨92歲蕭湘為亡夫辦笑喪 祝願大家打倒疫症長壽健康

更新時間 (HKT): 2021.06.02 19:33

新增內容

「播音皇帝」李我於上月5日與世長辭,享年99歲,今日在香港殯儀館出殯,靈柩隨即奉移至柴灣歌連臣角火葬場舉行火化禮,沒有宗教信仰的李我叔,採用綠色殯葬,將骨灰撒在紀念花園。李我的遺孀蕭湘強忍哀傷,陪亡夫走最後一程,並在昨晚的設靈儀式上致悼辭。

身材嬌小的湘姨由親屬攙扶下,站在靈堂前致辭,旁邊是她送給老伴的花圈,寫着「琴弦音斷 情意難忘」表達愛夫之情!湘姨先向來賓致謝,並感謝舊僱主商台:「商業電台一直照顧我先夫嘅生活同身體,然後先至有今日99歲,我衷心的感謝,我希望各位為我哋商業電台高舉...」湘姨舉高手臂,祝福商台:「成功,多增啲廣告,我哋為商業電台服務。」李我與蕭湘結婚逾71年,相依相守大半生,湘姨同樣是著名播音員,藝名「蕭湘」都是李我幫她所改,蕭湘於1959年加入商台,有「倫理小說之母」的稱號,兩夫婦在商台服務多年,貢獻良多,李我晚年身體不適,商台一直有照顧他的生活。

蕭湘:估吓我今年幾多歲呀

接着,湘姨聲線轉低沉,有感而發說:「對唔住呀,我講得嘢太多,因為本人都年紀老邁,我先夫99歲,人哋話加天地人3歲,佢已經102,而我呢,都唔係好後生,你哋估吓我今年幾多歲呀?估中有獎呀!我哋輕鬆一吓啫,老生90有2。」有來賓發出嘩嘩聲,湘姨說:「唔使嘩,我希望各位一樣咁長壽,好似我先夫咁,今日喪禮我哋應該笑呀,我哋話呢個係笑喪,所以,我哋做人呢,一定要向上、向前進,先會身體健康,尤其而家疫症咁猖狂嘅時候,我哋一定要打倒佢,各位要鍛煉身體,我哋多啲衞生常識,勤啲洗手勤啲飲水,我哋乜嘢都為自己向上。」

最後,湘姨感謝來賓在黃雨下出席喪禮,多次向大家道謝表達心意:「各位百忙中,仲要風雨淋漓之中嚟到呢度,為我嘅先夫見佢一面,多謝多謝,衷心的多謝。各位,而家深夜咁滯啦!」賓客中有人笑了,湘姨聞聲說:「我可能懵懵哋啦,而家係咪深夜?唔係,而家7點鐘傍晚時候,外面大雨淋漓,我驚大家冷親或者淋親,各位,多謝今日的出席,多謝各位咁有心,多謝多謝,衷心的多謝多謝,拜拜。」

鄧寄塵兒子從美國來港扶靈

今日出殯儀式上,湘姨感謝8位為亡夫扶靈的朋友,包括:胡楓、丁羽、李天弼、呂洪廣、阮兆輝、羅家英、鄧兆華教授和粵劇老倌李龍,而鄧教授是粵語片笑匠鄧寄塵之子,他是一位很出名的精神科教授,為送李我叔最後一程,從美國返港接受14天隔離,今日凌晨12時才在隔離酒店出來,趕着今天去拜祭李我叔及扶靈。湘姨致辭時說:「老生,亦都係老娘本人,好多謝各位,放低一切公事嚟送我亡夫李我一程,十分感激,我用言語嚟感激之外,他日我哋相見時,我請各位痛飲一杯,尤其我最尊敬、最心領嘅8位扶靈老兄,雖然我大佢哋好多,但佢哋係我亡夫嘅良師益友,心領心領。」

接着丁羽代表致辭,他說:「我同李我叔亦師亦友,佢雖然大我12年,我當佢長輩看待,我哋相交用心,佢同我講過:『細佬,你同我都係靠咪搵食,而家有兩樣嘢提點你,埋咪前一定要清喉嚨、講嘢一定要用丹田。』呢樣係我真真正正受用,我配音要用氣力,尤其是配打聲時候,唔用丹田會好傷,所以李我叔教我呢兩樣嘢,我至今受用,亦傳畀配音界後輩。喺李我叔晚年,我哋相交頻密,我最難忘佢畀咗三把扇我,蕭湘嬸話我執到,因為佢只得十幾把扇,佢仲有提詩詞畀我。李我叔,呢樣我係到而家都好記住,多謝你,你教我嘅嘢永記於心。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner