湯寶如談媽媽管得嚴98分仍被鬧 兒子專注力不足食藥影響胃口

更新時間 (HKT): 2021.06.02 21:21

現年49歲的歌手湯寶如(湯記),早前接受馬浚偉主持的港台節目《同理‧繼續傾》錄音訪問,節目前日播出。湯記大談往日媽媽管教嚴厲,以及兒子曾因專注力不足要食藥,影響他沒有胃口,最終要停藥。

馬浚偉在節目中透露已有七、八年沒見湯寶如,兩人在節目中談及湯記成長經歷,尤其當醫生的媽媽管教甚嚴,湯記指一直夢想當教師,但媽媽想她做一些專業職業。湯記感壓力亦是來自媽媽,她說︰「嗰時考唔到90分會鬧,有次得98分,佢會話我『你冇溫書,唔記得寫句號?老師冇教你咩?你冇留心聽書』,佢係好認真、好嚴。」她坦言在高壓下,她才反叛的去參加新秀歌唱比賽,「係先斬後奏,點知入到5強,當時我冇諗過唱歌會成為我嘅職業。」入行後,因為工作經常夜歸,被媽媽要求她搬出去住,她說︰「未聽過阿媽要個女搬出去,佢話你都搵到錢,就自己搬出去唔好嘈住我,當時我真係喊咗,要自己照顧自己。」湯寶如當年在寶麗金賣盤後,曾暫別樂壇,當時她去進修,報讀犯罪心理學及特殊教育課程。

談到香港教育制度,湯記坦言︰「我覺得香港嘅教育唔係好妥,因為我個仔係讀名校,佢好辛苦,日日做功課到晚上11點。」她指今年13歲的兒子,在幼稚園升小一時,發現有專注力不足,求醫後一度要食藥,她說︰「佢同我講『媽咪我唔想再食個啲藥,食完我冇胃口,而且幫唔到我,我記唔到嘢』我都發現佢過段時間真係呆,又冇胃口,佢唔食藥反而諗嘢快啲,而家已經停咗藥。」提到她的男友知道兒子有專注力不足時好落魄。湯記更指有一次因為好嬲,對兒子說了不該說的話,她說︰「我曾經試過,嬲起上嚟話『你有專注力不足』,之後好後悔,同阿仔講返唔好意思,話佢知你大個咗就冇事,要慢慢鼓勵佢,要提醒佢。」

其實湯寶如未入行前,曾當幼稚園教師,她於1990年參加第九屆新秀歌唱大賽而入行,當年她與劉小慧、黎瑞恩被稱「寶麗金三小花」。湯記因與張學友合唱《相思風雨中》而為人熟悉,先後推出金曲有《感冒》、《緣份的天空》等。1998年她約滿寶麗金後,一度暫別樂壇,2007年8月她與圈外男友誕下兒子,兩人共識不會結婚。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner