【娛樂人物】曾戀傅聲、麥當雄 對盧海鵬既愛且恨 
大姐明求得好老公 險變劏豬凳

更新時間 (HKT): 2021.06.03 02:00

現年64歲的「大姐明」林建明情史豐富,十多歲跟傅聲puppy love後又跟當紅監製麥當雄相戀,還有大班公子哥兒、律師、大狀、建築師男友,不過最後還是揀了有線前執行董事曾展章做老公。早前她接受《蘋果》專訪,大爆與老公新婚時險變劏豬凳的經歷外,更直言對最佳拍檔盧海鵬既愛且恨。

採訪:戴彩煥

攝影:沈健程

林建明年輕時樣靚身材正,裙下之臣浪接浪,大姐明1973年當選沙灘小姐後,獲亞視安排與劉松仁拍攝麗的劇《冬綠》,但作為新人開工時難免NG,越NG就越緊張,幸得到當年任助導的麥當雄安慰,從而發生感情,她說︰「有次去梁愛屋企開party跳慢舞,跳完佢拖住我隻手唔放,咪拍拖囉,我偏好又瘦又高嘅人,佢當時好瘦,但佢後期瘦到我阿姨以為佢吸毒,制止我哋來往。拍咗兩、三年,因為佢太忙,我又活力充沛,成日去放電,覺得佢成日唔喺我身邊,同埋大家唔識溝通,就冇一齊。」

曾展章遭長籤刺穿腸

大姐明從小渴望有個完整家庭,38歲跟拍拖多年的無綫高層曾展章在英國結婚,她透露當年是女追男︰「有次《蝦仔爹哋》俾人包咗去蛇口,為一間新酒店做宣傳,佢當時噬起棚牙好好笑容,畀我好深刻印象。」那次大姐明的內地親友來探班,曾展章更讓出房間給其親友居住,令大姐明對他加分︰「之後返《歡樂今宵》,放工飲嘢佢跟埋去,我飲到有少少醉,車佢返屋企時我啜咗佢一啖,有觸電感覺,大家就係咁開始。」

不過談到兩人的英國婚禮,大姐明即時皺眉,皆因曾展章突然大病,她說︰「嘩!去機場接佢時佢瘦到似白粉道人!諗住英國結婚少啲人,點知亞洲電視選亞洲小姐,派咗成crew人嚟英國,仲嚟埋我婚禮,當時要兼顧太多嘢,好慘呀!」當時記者起哄叫新郎抱起新娘影相,大姐明更嚇到「鼻哥窿冇肉」,「我feel到佢對腳喺度震,幾驚佢將我撻低!」婚後,兩人如期到歐洲度蜜月,但每到一個地方,新郎哥總要出入醫院。「當時擔心佢係咪cancer?嘩,一結婚你就死?我咪變劏豬凳?」呂有慧前夫金童懂氣功,大姐明請對方為老公做氣功治療,做完更要call白車送院,最終開刀查看,發現曾展章的大腸被長籤插穿,大姐明說:「金童同佢做氣功一chok,支竹籤插到佢大腸穿咗,變咗腹膜炎,如果支竹籤當日唔係咁穿咗,佢可能成世要孭屎袋或死咗。」

「做親嘢都令我受傷」

談到她生命中另一個重要男人:盧海鵬,大姐明坦言曾很嬲這個拍檔︰「我好欣賞佢,但另一方面,佢同我做親嘢都令我受傷。」做《歡樂今宵》趣劇時,大姐明試過被鵬哥撞傷下體,痛不欲生︰「佢一係突然間的起我,撻我落地,一係突然間推我,當時我哋都係咁打嚟打去,有次拍古裝短劇,佢推我,啲圓凳好硬㗎嘛,我唔覺意撞咗落去,下體腫晒,痛到呢!」大姐明想起當日痛楚,亦忍不住掩面,她指︰「我唔會話佢,如果話佢就驚佢有戒心,演出時忌住忌住,咁佢亦唔係有心嘅。」

娛聞樂陪你走遍全球追星,即Like「娛果」FB 專頁!
BannerBanner