余文樂冇罩狂歡一晚踩三場 疑夜店攬女咬耳仔勁煙韌

更新時間 (HKT): 2021.06.03 16:43

已為人夫人父的余文樂,自疫情後一直留在台灣陪伴老婆仔女,IG經常post相營造好老公好爸爸形象,不過原來他近月悄悄返港,上周五(5月28日)更被《蘋果》讀者目睹在西九參加200人無罩派對,余文樂不但在餐廳內脫罩煲煙,還飲到滿面通紅醉醺醺。由於事後有警察到場了解,有人打開側門讓部份人「走鬼」四散。

余文樂疑玩得未夠喉,當晚即與朋友轉場到中環一夜店繼續消遣,有《蘋果》讀者余先生當晚目擊他在場內被最少10個女子包圍,不過余文樂跟穿吊帶露膊的女士頗為熟絡,多次攬實女方冧爆咬耳仔,在酒酣耳熱下,未有保持社交距離。

黑衣露膊女「咬耳仔」

據讀者余先生表示,當晚他和朋友約11時半到達夜店,甫入餐廳已見余文樂和幾位同性朋友坐在當眼處,枱上放滿威士忌、伏特加等烈酒,早已飲到滿面通紅的余文樂,邊飲烈酒邊煲煙,情緒高漲。讀者說:「佢食煙食得好狼,煙駁煙咁滯,見佢嗰陣已經好醉,講嘢好大動作,又冇戴口罩,所以場內有好多人都認得佢,隔咗一陣就有10個8個女仔行埋佢張枱撩佢傾偈,余文樂對住啲女仔好風騷,邊講邊大笑。不過如果講最close,就係坐佢隔籬着露膊衫嘅女仔,見余文樂攬實佢之餘,仲挨到好埋咬耳仔,兩個傾咗好耐,個女仔個樣勁冧。」

轉場俾女圍

讀者在中環夜場逗留到半夜約兩點,之後和朋友再轉到上環另一間酒吧繼續消遣,誰知余文樂早已先他一步。讀者續道:「雖然已經係深夜,不過上環呢個場依然多人,可能附近得返呢間仲有開。入到去又見一堆女仔圍住佢(余文樂),見佢間中企起身扭兩下條腰,好似同啲女仔跳緊舞咁,都挨得幾埋。」

當晚連踩3間店舖的余文樂,事後在IG透露由於長期工作壓力關係,因此在3年前患上驚恐症,稱經醫生診治和食藥後,病情原本有所改善,惟近日驚恐症復發,感到害怕的余文樂,雖然強調會用正面態度去面對病情,之不過上周卻被發現流連夜店,又煙又酒又攬女,未知這是否他的「另類療法」紓緩病情。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner