被舊愛揭出軌 做好自己挽形象 
Edan:擔心都冇用

更新時間 (HKT): 2021.06.03 02:00
■(左起)Edan、Anson Lo和Ian即場跳精神健康操,齊齊分享減壓心得。

人氣男團MIRROR的三位成員呂爵安(Edan)、盧瀚霆(Anson Lo)和陳卓賢(Ian)獲邀擔任健康精神大使,三子昨日在鰂魚涌出席記招,宣佈下月24日舉行「Never Give Up網上慈善演唱會」。形象乖巧的Edan早前疑被前女友Stephanie在網上爆出軌,又被網民指控他撩女開房,被爆負面新聞後,Edan曾網上出post,表示「私人同過去感情事唔會回應,唔希望影響任何人」,昨日Edan首次現身,明顯有備而來,坦言事件發生後感到不開心,但過了幾天便沒事,希望大家專注他的工作。

「一直調整自我」

Edan直認有跟舊愛聯絡:「我哋係有溝通過,但唔想再影響到佢,所以畀多啲空間大家。我OK嘅,面對到嘅。」談到被翻舊情史,他自言作為公眾人物要懂得面對,一直在調整自我,同時感謝大家關心。問到會否擔心影響形象?他說:「擔心都冇用,提自己要做好自己,班兄弟都keep住支持。」問到之後於網上留言會否更謹慎?他說:「唔回應喇,多謝大家關心。」身旁的好兄弟AL幫口說:「希望外界多啲關注我哋喺幕前嘅努力同成果。」

三子表示工作浪接浪,MIRROR演唱會後各有各忙,談到姜濤最近疑似壓力爆煲,Edan說︰「佢係太忙、好攰,但𠵱家情況OK。」AL則呼籲大家給予姜濤私人空間,Ian則笑指他休息後的網上留言比之前更開朗。

AL不喜粉絲鬧交

對於有指AL粉絲內訌,有粉絲投訴歌迷會會長數目不清、玩弄權力等,AL表示經理人「花姐」黃慧君有跟他提及事件,他認為:「每個人都有唔同意見,每個人對與錯嘅睇法都唔同,希望大家一團和氣。」問他會否親自出面調停?他說:「唔係太喜歡見到人鬧交,希望盡快有解決方法,相信我嘅粉絲好乖。」

Ian本月9日生日,他笑指早前工作時得知跟唐老鴨同日生日,大感開心,更獲贈滿屋唐老鴨公仔。問到女友盧慧敏有何表示?他說:「我哋唔係節日感好重嘅人,相信生日快樂都有句嘅。」

娛聞樂陪你走遍全球追星,即Like「娛果」FB 專頁!
BannerBanner