大姐明睇真D 4丨林建明新婚險變劏豬凳 曾遭盧海鵬撞傷下體

更新時間 (HKT): 2021.06.03 00:00

64歲的大姐明林建明年輕時青春無敵,追求者眾,10多歲跟傅聲puppy love,之後跟當紅監製麥當雄相戀,還有大班公子哥兒、律師、大狀、建築師男友交往,身邊男人個個猛料,到最後揀了有線前執行董事曾展章結婚。

聽說80年代大姐明曾跟「沙王」拍拖,有機會當上「王妃」,她聞言哈哈大笑說:「沙王只係一個普通男人、路人甲,因為我叫沙姐,佢姓黃,所以搞笑叫佢『沙王』。」

情傾高瘦麥當雄

大姐明1973年當選沙灘小姐後,獲安排與劉松仁拍攝麗的劇集《冬綠》,因為不了解電視製作,開工前沒有熟讀劇本,結果不停NG,越NG就越緊張,幸得當年任助導的麥當雄安慰,令大姐明深受感動。

跟麥當雄戀情何時正式開始?「有次去梁愛屋企開party跳吓舞,跳慢舞,咁拖住手跟住唔放,咁咪拍拖囉,都唔知點解呀,我有啲問題嘅,偏好又瘦又高嘅人,佢當時好瘦,有個好感囉,但佢瘦到後期我阿姨以為佢吸毒,制止我唔畀我同佢來往。拍咗2、3年,中途斷斷續續,因為佢實在太忙,嗰時啱啱開始起步同埋當紮,我又活力充沛,成日周圍去放電,成日覺得佢冇喺我身邊咁嘅,同埋大家唔係好識表白,唔識溝通,所以冇一齊。」

被曾展章笑容吸引

大姐明從小渴望有個完整家庭,38歲那年,跟拍拖多年、當時任職無綫高層的曾展章在英國結婚;唔講唔知,當年原來是大姐明主動追求。「有次《蝦仔爹哋》俾人包咗去蛇口,為一間新酒店做宣傳推廣,我哋成班演員幕後,惟獨一個我唔識,就係佢(曾展章),當時佢噬起棚牙好好笑容,畀我一個好深刻印象。」大姐明最喜歡人成日笑,所以對曾展章特別留意,那次去蛇口,大姐明的大陸親友前來探望,曾展章讓出房間給大姐明親友居住休息,相當識做,令大姐明對他印象加晒分。

「之後返《歡樂今宵》,放咗工飲吓嘢,佢跟埋去,我又飲到有少少醉,我就車佢返屋企,車到佢返屋企時我啜咗佢一啖囉,大家就係咁開始。(你追佢?)我覺得係,我當其時有少少高不成低不就,好嘅人哋未必想要你,比較一般嘅市民未必敢埋身,我當時冇諗咁多,只不過好開心,飲咗啲酒,goodbye kiss咁之嘛,有啲觸電感覺。」

英國婚禮留不快回憶

結婚理應是人生最開心時刻,不過大姐明就以「好唔開心」來形容她的婚禮,重提這次人生大事時即刻皺眉。「全部我一個人去英國搞晒,因為要預早去登記、排期,當時佢(曾展章)成日唔舒服,又唔知乜嘢事,去機場接佢機,嘩!好似白粉道人咁,瘦到呢!同埋塊面灰色晒,冇辦法,夾硬上啦!諗住去英國結婚,少少人,點知亞洲電視選亞洲小姐,派咗成crew人去英國,我結婚走嚟影走嚟拍,我已經要兼顧個婚禮、兼顧面如死灰嘅人,又要兼顧埋你crew人,我真係覺得好慘呀!」當日一班記者起哄要新郎抱起新娘影相,大姐明嚇到「鼻哥窿冇肉」。「我feel到佢對腳喺度震呀,我幾驚佢將我撻低!」

婚禮後,一對新人如期飛到歐洲度蜜月,但每到一個地方,新郎哥總要出入醫院。「我哋去英國睇歌舞劇,好grand㗎嘛,佢痛到坐咗落地,即刻入院啦;跟住去巴黎遊船河,又係咁𨀤低(暈倒),入咗醫院又話冇事喎!究竟你乜嘢事呢?我喺度擔心,乜嘢醫生都睇過,乜嘢名醫都睇過,又冇嘢喎,係咪cancer呢?嘩,一結婚你就死?我咪變咗劏豬凳?」呂有慧前夫金童懂氣功,大姐明就請對方為老公做氣功治療,結果有次做完後老公即時暈倒,要call白車送院。

初步檢查後發現一切正常,只是有些發炎,在醫生建議下,曾展章決定開刀查看清楚,結果發現大腸被一支長竹籤插穿。大姐明說:「原來佢有支竹籤,一路落,去到早一晚金童同佢做氣功戳一戳,支竹籤插到佢大腸穿咗,於是變咗腹膜炎。如果支竹籤當日唔係咁穿咗,佢(竹籤)可能之後再落去,可能成世人要孭屎袋,或者係死咗。(竹籤何以吞落肚?)佢屋企人話佢俾人落降頭,我就覺得佢因為飲酒飲到醉晒,可能支竹籤黐住啲三文治或者魚蛋,飲吓飲吓就唔會咬,係吞!我懷疑係咁,實際係乜嘢事都未知,而家都仲係一個謎。」大姐明不住的搖頭苦笑。

一提生育即落閘

既然渴望有完整家庭,為何婚後唔生BB?此時大姐明相當嚴肅和認真的說:「嗱,講到呢度,跟住落嚟我嘅婚姻或者其他嘢,都係我哋兩個人嘅事,比較私隱啲,唔想向人交代,亦都唔會對社會有乜嘢影響,我就唔會再多講。只不過我想講一樣嘢,就係任何人結婚前最好做婚前輔導,咁會好啲,呢個話題就完結啦!」

每遇鵬哥必受傷

要數大姐明生命中重要男人,其實還有盧海鵬,大姐明坦言,她曾經好嬲好嬲這個拍檔。「我其實好欣賞佢,佢真係好叻,無論扮嘢、演藝、歌唱、演技,佢都係好叻,好醒,轉得好快,但另外一方面,我同佢可能有一個緣份,佢同我做親嘢,佢都係令我受傷嘅。」

做《歡樂今宵》趣劇,大家都會即場爆肚玩即興互相推撞,大姐明就試過被鵬哥撞傷下體,痛不欲生。「佢一係突然間扚起我,撻我落地,一係突然間推我,當其時我哋大家都係咁打嚟打去㗎喇。有次古裝(《EYT》短劇),佢(鵬哥)到今日都唔知,佢亦都唔係有意,佢推我,古裝啲圓凳好硬㗎嘛,我唔覺意撞落去,撞到我下體腫晒,痛到呢(想起當日痛楚,大姐明忍不住掩面)……我又唔會話佢,如果你話咗佢,驚佢有戒心,演出時擏住擏住,咁佢亦都唔係有心嘅。」

又有一次,大姐明揸車跟鵬哥到九龍塘銀行,落車後叫鵬哥幫她看車,結果差點被自己部車碌斷腳。「我落車叫佢同我睇住架車,跟住我喺後邊走,我真係唔知佢做乜嘢,佢褪後喎!嘩!將我隻腳差唔多碌斷呀!好在我即刻拍拍拍,佢先知停,如果唔係,我隻腳俾佢碌斷咗,所以話佢呢個人真係得㗎啦!有時我演出太過投入個角色,唔妥佢,咁我當其時真係唔妥佢,但過咗又冇嘢囉!我覺得佢都係一個好拍檔嚟嘅,同佢有火花,又愛又恨,不過去到現階段,我都有少少擔心佢,因為除咗佢身體健康,佢情緒有啲問題,成日鬧人,乜人都俾佢鬧,而家仲更甚,希望佢健康啦,好多人都關心佢嘅。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner