MC張天賦難捨跟爸爸最後道別 含淚說聲:我愛佢

更新時間 (HKT): 2021.06.04 22:37

華納新人MC張天賦任陳志雲網上節目《Stephen傾》嘉賓前,曾對粉絲揚言決不會哭,但當與大師談及當年《造星II》比賽中經歷父親患癌離世、期間獲父親讚賞肯定,自責的MC終禁不住淚灑當場。

MC出身自富裕家庭,嬰孩時期已隨父母移民加拿大,但好景不常,爸爸因做錯決定「由富變窮」,他的人生亦從此改寫。MC因家庭環境問題,自幼香港、加拿大兩邊走,讀書不成,經常被父母打罵。直至前年參加《全民造星II》,希望能做出一些成績給家人看,他說:「阿媽成日話我冇份工做得長,係嘅,我太3分鐘熱度,唔定性。參加比賽期間,daddy患cancer,我要借住呢一個渠道證明我得、我係OK。當時好多人反對我玩音樂,包括媽咪,唱歌路好難行,唯獨daddy話你鍾意去做就做,唔需要理人講乜,但應承我要畀心機,佢都話,如果你夢想係執垃圾,咪執囉,唔好後悔。」

MC讀書成績差受壓力

談到親戚給予爸爸的無形壓力,MC開始眼濕濕:「因為姑姐同伯父啲仔女讀書全部好叻,我同伯父較friend,佢又會話佢哋都得,冇理由你唔得嘅。姑姐可能純分享,但呢啲說話會亦令daddy唔舒服,而佢又會話番畀我聽,『我個仔只係未到時機,唔係佢哋口中所講嘅垃圾』」。MC表示明白爸爸內心的痛苦,續說:「佢話:『仔呀,我最近開始唔敢同親戚見面』。我提過daddy曾經係一個富有人,突然去到冇錢,冇錢期間又剛同媽咪離婚,人生好低潮,佢一路未能接受,一路覺得自己做咗好多錯嘅決定......佢成日見舊朋友、舊同學買晒樓,又有幸福家庭,而佢只係一個好孤獨嘅人,連身邊最愛佢嘅伴侶都走埋,變相永遠有心事都同我呢個仔分享。佢會話:『最近唔敢見親戚朋友,唔想從佢哋口中聽到佢哋有幾幸福,而我再睇自己有幾落魄』,一定難過,有啲位我連大話都講唔出,唔會叫佢開心啲啦。」MC爸爸受情緒困擾,疑患抑鬱症,曾對MC透露自己想尋死。

跟爸爸最後道別

兩年前,MC爸爸證實患上癌症,左邊面生了一個腫瘤,連說話和食飯都有困難,MC不忍見到爸爸辛苦,一時間亦不敢面對。直至一次,爸爸病重臥床,並已插喉及不能說話,只能用筆寫着:「我好愛你媽咪,好愛你!」MC忍不住流下男兒淚:「嗰個時候會驚佢有咩不測,必需講嘅都講晒。同佢講我會睇住媽咪,攞返屬於原本係我哋張家嘅嘢,我會證明畀你睇我做到。嗰時佢插住喉,舉起手指公......細個都有(舉大指公),去到讀書冇見過,估唔到咁嘅時候見番。好似睇戲咁,你會將好細個嘅嘢回帶,返去同佢嘈交,自己唔生性,穿插一啲同朋友玩緊,佢打嚟唔聽或鬧佢,你會諗番自己講過嘅大話,但嗰陣你係望住一個咩都唔同你計較,笑住畀一隻手指公你嘅男人,最愛你嘅男人。」

最後,MC在《全民造星II》得到亞軍,可惜爸爸已經離開,他表示非常掛念對方:「曾經有首歌,原本想決賽時候唱《Talking to the moon》,夜闌人靜時,真係有個儍仔...對住個月亮講嘢,真係月亮嗰邊...講咗唔喊㗎嘛。我覺得我哋做完嘢係唔需要講,佢係會見到;但我都好後悔,喺佢床邊係講我會為佢啲咩,而唔係講我已經做咗啲咩。講係冇用,真係好冇用,所以想同佢講,佢個仔成長緊,未係最好、未complete,但相信佢會睇到我,我愛佢!」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner