綜藝の鬼丨Mike導認「異類」不在意批評 爆年底有新節目

更新時間 (HKT): 2021.06.05 00:00

「無制限OT編集団」,來源是拍《花姐ERROR遊》時,撰稿阿暉(麥可暉)應Mike的要求為團隊起一個切合日本節目風格的名字,結果團名一直沿用至今。OT編集団旗下已有5個節目,團隊守則除了「要保持心境開朗」,還有另一條「真人騷拍第一個take要夠真」,聽落規模唔嘢少,但其實陪Mike完整走過所有節目的,只得阿暉。Mike形容自己是「異類」,從阿暉身上找到一點與自己相似的地方。Mike又形容這位兄弟:「係有內涵啲嘅一個人,我自己就冇乜。」

OT編集団已經收到公司新order,今年底會有節目,Mike希望團員今個月好好休息,預計下個月又要圍爐度橋。但《自肥》珠玉在前,大結局《電視?為甚麼?》將底線推高到接近天花板,Mike一如以往保持樂觀:「下個節目出街時間係11月左右,做到啲乜出嚟?有咩突破?暫時壓力係大,但良性嘅,即管睇吓可唔可以再高啲。」惟獨是拒絕ERROR這點,Mike最希望做得到:「完咗《ERROR遊2》已經唔想再合作,驚令自己冇進步,所以先有《郊遊遊》同《大海男兒》。未來未有方向,但下個節目,任我哋創作,放完假先諗。」

講未來頭頭是道,但觀眾更在意眼前,之前瘋狂為主題曲刷點擊,找數未?答案7個字:「籌備緊,未透露得。」網民一直以為,MV找數與第14集未講完的短劇《ERROR流忍者》有關,Mike今次有解釋,只是因為受到節目時間限制才會變成待續:「的而且確仲有三場戲拍咗未剪落去,今個月內觀眾會喺公司網站睇得返。」

《ERROR流忍者》,由第一次合作到《自肥》,終於半講笑下成真,但阿Dee(何啟華)仍向世界呼喊,「保持熱度積極關注,或者有日可令此劇成真。」原來此話背後有段故,記者向Mike求證,拍綜藝以外,他曾經寫過劇本力sell畀老細,劇集正正是《ERROR流忍者》!Mike沒有透露闖關失敗的原因,但就說:「老細係一個好有獨特見解嘅人,冇完全ban。」

半年後有新作 怕觀眾流失

人紅是非多,《自肥》未做完已經受到批評,尤其是在娛樂圈有幾倍經驗的查小欣指摘低俗無教育意義。「隨便啦!」Mike原來一點都不在意:「做節目係滿足唔到全部人,網民有回應,觀眾有回應,有好嘅時候亦有唔好嘅地方,我好早時候已經學識咗睇唔同意見。」

有批評甚至無限聯想,點名指Mike拍節目搶主持鏡頭捧紅自己。Mike再次解釋,第一次出現是因為《花姐ERROR遊》意外入鏡,覺得自己外形唔討好才打格仔,漸漸成為角色設定。誤打誤撞發現幕後鏡頭得到觀眾歡心:「我哋當咗節目效果咁睇,呢個效果又唔係需要特別畀錢,咁啱幕後又有趣,冇理由嘥,我哋叫喺香港做呢樣嘢先。」結果幕後出鏡傳統,到《自肥》大豐收,助導Rain. P拍的日本暴走族對香港黑社會,神奇地交代了團隊開開心心開工的精神。

訪問尾聲,Mike主動開口講受到外界關注:「而家多咗人留意自己,對自己同團隊壓力係大咗,始終我哋唔係幕前,中間呢個時間唔會有演出,點喺呢個半年,喺下個節目出街之前,可以令呢班鍾意自己嘅觀眾唔流失……真係估唔到有咩結果。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner