CHILL CLUB音樂會丨姜濤趁放假打針等出埠開工 Serrini自爆拖Ian緊張到出手汗

更新時間 (HKT): 2021.06.05 23:56

CHILL CLUB音樂會結束後,姜濤與Ian一起受訪,姜濤多次表示緊張。之前姜濤在IG上表示「I’m tired of everything」,今日是他小休後首次活動,他說放了約一星期假叉電:「我OK呀!」放假用了好多時間睡覺,並順便打了疫苗。姜濤透露公司稍後可能會安排去外地工作,所以要先打針,不過打針前好緊張:「無乜副作用,好耐都冇打過針,為咗屋企人着想都有去做(打針)。」

今日姜濤穿上一套真空V領黑西裝,非常顯瘦,他說之前未有着過類似服飾,今次希望試新衫,又說沒人叫增肥:「都仲係叫我瘦啲,我會減減。」今日姜濤唱歌跳舞都有點不在狀態,他解釋:「有啲緊張,今日真係好緊張,出表演前大家都摸摸我心口。」他又說上月演唱會身邊有一班MIRROR兄弟較安心:「同埋都有一段時間冇公開活動,真係有啲緊張,我下次會做得好啲。」

下周三生日的Ian,獲fans「hellosss」在巴士站落燈箱廣告慶祝生日,他多謝fans的悉心安排:「佢哋好好,但我呢排工作好忙,冇乜時間落去睇吓啲燈箱,上網有見到,好多謝。」

Ian說今年生日與以往一樣在工作中度過:「以前都冇話特別要慶祝,可以逼咁多工作人員一齊慶祝都幾好喎!」由於最近沒有時間,未能約女友盧慧敏(Amy)食飯:「嗰日要做嘢,冇話特別去慶祝,可能之後簡簡單單食餐飯就OK,我唔係咁着重儀式感。可能之後得閒返啲就會食,同埋都要同屋企人食。」

Serrini在訪問時讚姜濤及Ian可愛,Ian透露兩人手拖手在台上旋轉跳舞,其實是即興,綵排時沒試過拖手:「佢都好可愛,佢真係特登走入嚟化妝間問花姐可唔可以(拖手)。都幾好玩,氣氛幾好。」

另一邊廂,Serrini與林家謙一同受訪,Serrini聲明事前有問准花姐才與Ian拖手,更擔心地反問記者:「你覺唔覺得我好緊張?掂嗰陣我有啲手汗,但最後都掂咗。」問到姜濤和Ian誰比較可愛時,她就大讚兩人都好可愛,提到她還有阿Jer(柳應廷)時,Serrini即改口話:「個個都可愛,Anson Lo……仲有其他嘅!」

雖然Serrini的可愛名單中沒有身旁的林家謙,不過她就希望對方能盡快開騷:「希望佢可以喺鋼琴前,好似鋼琴王子咁……」記者即表示今晚林家謙有彈琴,但Serrini就大笑話:「今晚冇睇佢!」問她今晚是否只是望住姜濤,她笑說:「梗係啦!」但隨即又改口話:「今晚個個都好鍾意,所有人都好欣賞,包括隔籬呢位林先生。我好想睇佢喺個台彈鋼琴咁升上嚟,好似Edan(呂爵安)咁。」

而林家謙就自爆今晚演出時遇上大災難:「我個琴降咗半度,所以我同Band係唔同,佢哋入咗(音樂)一下發覺唔對路,跟住成隊Band都要轉,但到第二首歌佢哋都彈番原Key,我就要彈成首歌嘅升半度,所以我成個腦就諗緊轉key,歌詞又唔記得,所以好恐怖,我係未試過咁大件事。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner