Regen不忿被老屈做第三者 千字文轟網民:亂打幾句覺得好有道理

更新時間 (HKT): 2021.06.05 15:07

32歲的前HotCha成員張惠雅(Regen)自從與年輕8歲的男友分手後,為情激瘦到只得84磅,飽受情傷的Regen近日身體不時出現無名腫毒,日前在IG貼出滿佈黑斑的右腳,到診所求醫時,醫生一度以為她吸毒,但實情是去年到越南露營被蚊蟲和沙蝨所咬,不過一年過後患處的黑色素越變越深所致。

右腳佈滿黑斑的相片曝光後,迅即惹起不少負評,更被重提當年被傳介入老闆薛世恒與陳法拉婚姻,甚至HotCha宣佈解散一事歸咎在Regen身上!今日清晨時份,Regen在社交平台撰寫千字文反擊網民,她直言自己的EQ差,即使是發生小小不開心的事,她都會在社交平台放負,雖然本身「癲癲哋」,但仍然有被逼到癲的時候:「每一次,每一次啲人都要屈我係小三,我真係介意,曾經對我傷害過嘅人我都係唔會忘記佢哋,誣捏我放假新聞、逼我影假新聞相、逼我做拆散HotCha嘅罪人,一條又一條嘅罪名放喺我背上!」經歷過後,Regen坦言學識斷捨離:「斷捨離呢一啲對自己有害嘅人,我好記得有事嘅時候,重要嘅人一句嘅說話都冇幫過我,或者輕輕鬆鬆踩幾腳,畀我慢慢咁跌入谷底!」

被指吸毒動真肝火

提到被指吸毒,Regen說:「我估最毒嘅都係飲酒,但係香港又合法化,酒精好多化學性合成物,唔靚嘅酒都可以好傷身體,吸毒都唔會淨係爛得對腳啦我估。講毒品,我哋睇緊嘅嘢食緊嘅嘢,其實咪又係一樣咁毒,有時候娛樂圈嘅世界,就係要啲 juicy啲字眼,將佢放大,咁大個人可唔可以分析吓,你哋世界可唔可以唔好淨係得攻擊同埋judgement,坐喺度亂打幾句覺得自己好有道理,呢個世界滅亡都係因為我哋呢班人類, 自大、虛假、破壞、自私!」

直斥網民誣捏

Regen還表示當初開餐廳,只不過希望可以營造到一個自己喜歡而客人都會好放鬆的地方,香港生活實在太攰,連呼吸都覺得很困難,這時候不如給別人多一點關心別人,最後她更直斥連登仔:「就係過往你哋所有嘅誣捏,令到一個未做過小三嘅人、討厭小三嘅人,成為咗一個好似全世界公認嘅小三,淨係識得揸住一張相話咗我咁多年,咁叻嘅查個真相出嚟啦!查到真相邊一個當時屈我嘅,畀返啲獎勵金又得,要一啲酬勞又得,橫掂我俾人屈咗咁多年都好想搵到真相!」她續說:「唔好踩人哋嘅夢想,踐踏人哋建立嘅嘢,因為咁樣你永遠都係只係喺最低層,俾呢個世界慢慢侵蝕你,直到下一世再下一世再下一世,呢啲嘢都係令到發癲嘅原因,我而家都仲係要食緊藥㗎,喺自己平台叫阿春、疏吓肝冇影響到你啩?」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner