非常人●非常事丨影后阿Joe出國拍戲出醜 貪心偷酒店物品險被捕(白露眉)

更新時間 (HKT): 2021.06.06 00:00

90年代是香港影壇發展的黃金時期,一年可以開拍幾百部電影,不少演員同期有幾部片在拍攝,所以演員就出現甚麼「鄭九組」和「周十組」等稱號。

當時港片市場大,製作費相應提高,好多電影都有錢出國拍外景,但在外國拍戲,就有些演員做出一些好丟臉的醜事,我聽一位製片阿神爆料:「嗰次同影帝臣哥,同埋影后阿Joe一齊去歐洲拍一部愛情片,到埗第一日,臣哥就好大方請晒全組工作人員去食飯,但阿Joe就好鬼孤寒,我印象中好似冇請啲crew食過一餐飯,但冇諗到佢會貪心到偷嘢。」

其實演員吝嗇沒有問題,但貪心就會出事,話說這次出國拍外景,男女主角都是住5星級酒店,幕後製作人就住3星級酒店,已經很不錯,阿神說:「我每日都會出車去接送臣哥同阿Joe,佢哋住嗰間古堡酒店真係好鬼靚,佈置全部係法國宮廷式,房入面用嘅餐具、用品全部都係好華麗,係特別請名師設計嘅,喺出面係買唔到嘅,可能因為咁,先會令阿Joe見獵心喜。」

外景拍攝完,攝製隊準備回港當日,阿神就負責去主角酒店接送他們去機場,怎料結賬後準備出車時,他們竟然被酒店保安叫停,保安表示酒店有失物,所以要檢查一下客人行李,阿神:「保安話阿Joe間房有啲銀餐具、風筒同電話座都唔見咗,所以想睇吓係咪住嘅客人唔小心袋走咗,原本我哋唔肯畀佢搜行李,免得阿Joe冇面,但保安話唔合作就報警,我哋諗諗吓都係唔想搞大件事,因為差佬嚟咗大家可能冇咁快可以返到香港,所以都係勸阿Joe俾人搜行李,咁結果酒店唔見咗嘅嘢,全部喺佢嘅行李箱入面囉!當時大家都想搵窿捐啊!咁死尷尬,阿Joe完全若無其事,話可以畀錢買呢啲嘢,人哋話非賣品,攞返就唔追究,酒店算係好寬容,但我就覺得醜死人,影衰晒香港影界。」

----------

作者介紹:白露眉,縱橫娛樂圈35年的資深記者,看盡圈中人情冷暖;這年頭,地球病了,娛樂圈轉慢了,白露眉是時候出手了,在《蘋果》分享【非常人•非常事】,跟「蘋民」圍爐取暖。這次會一周寫兩期,每逢周三和周日刊登,不過周日不會開名寫人物,我會以秘聞方式寫娛樂圈的有趣事。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner