弊傢伙玩大咗 《網絡紅人死亡真相》驚喜派對變死亡直播|果燃上架

果燃電影|網絡紅人死亡真相

更新時間 (HKT): 2021.06.07 00:00

時代已經改變,媒體生態改變嘅速度快到令人望塵莫及,幾個社交媒體巨擘喺2020年美國大選嘅威力,大家都見識過。那邊廂Woke(覺醒)、SJW(社會正義戰士)、Cancel(取消)等網絡文化,喺歐美掀起咗一場流行文化大革命。抖音文化外銷全球,出事新聞多到數都數唔晒,但出事還出事,玩還玩,偏偏啲人又玩到欲罷不能。這邊廂嘅香港,某某KOL喺Facebook出個po就足以改變政策。

時代已經改變,別再留戀傳統媒體意識形態,歡迎進入網紅時代。Facebook、YouTube、Twitter、微博、Instagram、抖音成為一眾素人嘅英雄地,網紅分分鐘比明星還要紅,越係我行我素、言行偏激就越高人氣,越係譁眾取寵、刻意炒作就越高click rate。

果燃電影|網絡紅人死亡真相 一按到果燃台足本收睇

今個星期果燃台推介本地薑短片《網絡紅人死亡真相》,由《十年》伍嘉良監製,編劇兼導演係梁焯霖。梁焯霖係乜水?

佢係一個剪接師,為人所熟悉的作品有電影《點五步》、ViuTV劇集《短暫的婚姻》、《假設性無罪》、《二月廿九》、《三一如三》等等。

佢係一個網絡紅人,幾年前搞咗個facebook專頁「陌樂偈」,日日逼自己搵陌生人傾偈,啲片click rate都幾唔錯。

佢係一個演員,演出過《教束》入面嘅「K同學」、《三一如三》嘅暴躁編劇,仲有本片主角網絡紅人Johnny仔。

唔係玩唔起呀嘛?為咗click rate,你會去到幾盡先?呢日網絡紅人Johnny仔,約埋一班好友租咗間度假屋,為女友嘉嘉(呂珮琳飾)搞個事先張揚偷食事件大整蠱生日驚喜派對,順應觀眾喜好拍埋做真人show,做足綵排,萬事俱備,點知事情並不似Johnny仔預期。

弊傢伙出事了!今鋪真係玩大咗 !嘉嘉太激動,跳樓死鬼咗,驚喜派對無啦啦變咗死亡直播。為咗掩飾真相,眾人各懷鬼胎。

故事越演越烈,人物關係越揭越複雜,劇情發展有驚無喜,有人撞鬼,有人心中有鬼,全程被隱藏攝錄機拍低。

《網絡紅人死亡真相》果燃台現已上架,無區域限制供蘋果讀者免費觀看。

唔覺唔覺時代又已經改變咗,今期流行「躺平」精神,各位網紅,各位直播主,各位小粉紅,不如齊齊響應,倘若13億無產階級低端人口聯合起來!一齊躺平,可能會改變呢個世界都唔定!

果燃台 | 果迷專屬嘅影片世界

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner