專訪丨61歲洪朝豐黑暗日子已過去 迎接人生高潮:千祈唔好放棄自己

更新時間 (HKT): 2021.06.07 06:00

眼前的洪朝豐有點瘦,久未露面的他清減不少,「減肥,哈哈哈,因為着衫容易啲,而家132磅,哈哈哈,未夠㗎,可以再減少少,128磅就OK。」

洪朝豐的人生經歷大起大跌,與劉鑾雄前妻寶詠琴的一段情驚天動地,分手後自揭患上抑鬱躁狂症,2017年又確診舌癌,未幾再患淋巴癌,身心都病了,幸大步檻過,去年邁入60歲的他,接受《蘋果》專訪宣告出櫃!1年過去,再踏《蘋果》的洪朝豐別來無恙,割了三分二舌頭保命的他,曾經說話都是一件難事,現情況好了很多,沒再口齒不清,「身體復原得幾好,定期返醫院覆診。我而家講嘢仲有問題,因為要用力才講得清楚,當你用力時,有時個樣睇嚟唔自然,所以要攞平衡,其實練咗三年,初頭時會辛苦,成日咬親條脷,哈哈哈!」

有說癌症復發大多會在2至3年內,經常聽到「5年存活率」,若5年為一個關口,洪朝豐擔心嗎?他思考了一會兒,「我而家已經3年幾,但亦有醫生話,睇癌症其實要睇10年。嗯,你話驚唔驚?我覺得煮到嚟就食,3年幾前突然知道有癌症,我又唔會話:『Why me?點解係我?』自己能夠好順其自然接受。」他認為最黑暗的日子已經過去,現在是他生命的一個高潮,「以前會覺得自己懷才不遇,譬如喺99年離開咗主流電台媒體之後,雖然之後有機會做返媒體,譬如上廣州、去洛杉磯,或DBC數碼電台,但都唔算主流媒界,所以都一段時間有失落感覺,但而家覺得順其自然。」

這兩年香港發生很多事,社會運動和肺炎疫情,很多人冇工開,洪朝豐都受到影響,「我主要教聲樂、靜心同唱歌嘅學生,因為疫情關係屋企人唔畀佢哋嚟上堂,明明畀咗錢要退返錢,雖然收入會有影響,但我比較好彩,仍然OK。」曾經有厭世感覺的他,現在思想正面積極,「而家係好熱愛生命,希望可以盡自己能力幫人,講好聽啲係普渡眾生,睇吓幾多人有緣,做得幾多得幾多。」那些年,洪朝豐主持電台節目《日月星辰》大受歡迎,連奪數年「十大最受歡迎電台節目主持」,有否好懷念以前光輝歲月呢?「我又覺得自己唔係懷念,過咗去就過咗去,懷念好辛苦,我想將訴心聲呢樣嘢攞返出嚟,喺呢個人心慌亂時,又影響收入又影響旅遊,好多理想實踐唔到,呢個時候特別需要訴心聲。」

經歷過高低起跌的他,又有甚麼心聲要傾訴呢?「哈哈哈,早排睇咗無綫新聞部1986年訪問我嘅節目,嗰陣時我26歲,睇返自己後生充滿理想,然後理想又幻滅,想做歌唱家但起步太遲,回憶返自己都過咗大半生,我好多樣嘢都試過,首先係無愧此生,生命裏面充滿缺憾,但有缺憾才有圓滿,我嘅生命係圓滿,但獨缺一個男人。」61歲的洪朝豐仍在尋覓愛情,未搵到男朋友的他,現仍跟前妻同住,「佢仍然照顧我嘅起居飲食,好感激,兩夫婦離婚超過30年,佢仲全面照顧我,係好大福份。」至於兩人的獨生子洪葉,現於英國工作,「佢做網頁設計師,鍾意英國生活,選擇落腳。跟仔仔移民?唔會啦,哈哈哈,呢個歲數嘅人過去可以做乜,除非你自己創業啦,已經係退休年紀,我又唔願意去洗碗、做收銀,所以我冇諗住去。」

61歲的他經歷豐富,分享人生觀:「千祈唔好放棄自己,遇到困難要有龐大意志克服,但同一時間要順其自然,因為我見過有人好怕死,堅持唔想離開世界係好辛苦,堅持係啱,但要順其自然。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner