【娛樂人物】捱過抑鬱躁狂 兩度抗癌 
洪朝豐笑迎二次人生

更新時間 (HKT): 2021.06.07 02:00

眼前的洪朝豐有點瘦,久未露面的他清減不少,「減肥,哈哈哈,因為着衫容易啲,𠵱家132磅,哈哈哈,未夠㗎,可以再減少少,128磅就OK。」曾患上抑鬱症和躁狂症的洪朝豐,2017年先後確診患舌癌及淋巴癌並兩度動刀,切除三分二的舌頭及割出24粒淋巴核,惟前年再發現小腸生瘤,要再做手術,幸只是良性。兩度戰勝癌魔的他,曾經有厭世感覺,現在思想變得正面積極。

撰文:余燕儀

攝影:仇志德

洪朝豐的人生經歷大起大跌,與劉鑾雄前妻寶詠琴的一段情驚天動地,分手後自揭患上抑鬱症和躁狂症,2017年又確診舌癌,未幾再患淋巴癌,身心都病了,幸大步檻過,去年踏入60歲的他,接受《蘋果》專訪宣佈出櫃!一年過去,再踏《蘋果》的洪朝豐別來無恙,割了三分二舌頭保命的他,曾經說話都是一件難事,現情況好了很多,沒再口齒不清,他說:「身體復原得幾好,定期返醫院覆診。我𠵱家講嘢仲有問題,因為要用力才講得清楚,當你用力時,有時個樣睇嚟唔自然,所以要攞平衡,其實練咗三年,初頭係會辛苦,成日咬親條脷,哈哈哈!」

最黑暗已過去

有說癌症復發大多會在兩至三年內,經常聽到「五年存活率」,若五年為一個關口,洪朝豐擔心嗎?他思考了一會兒:「我𠵱家已經三年幾,但亦有醫生話,睇癌症其實要睇十年。唔,你話驚唔驚,我覺得煮到嚟就食,三年幾前突然知道有癌症,我又唔會話『Why me?點解係我?』自己能夠好順其自然接受。」他認為最黑暗的日子已經過去,現在是他生命的一個高潮:「以前會覺得自己懷才不遇,譬如喺1999年離開咗主流電台媒體,雖然之後有機會做返媒體,譬如上廣州、去洛杉磯、或DBC數碼電台,但都唔算主流媒介,所以都一段時間有失落感覺,但𠵱家覺得順其自然。」

這兩年香港發生很多事,社會運動和COVID-19疫情,很多人沒工開,洪朝豐都受到影響:「我主要教聲樂、靜心同唱歌嘅學生,因為疫情關係屋企人唔畀佢嚟上堂,明明畀咗錢要退返錢,雖然收入會有影響,但我比較好彩,仍然OK。」曾經有厭世感覺的他,現在思想正面積極:「𠵱家係好熱愛生命,希望可以盡自己能力幫人,講好聽啲係普渡眾生,睇吓幾多人有緣,做得幾多得幾多。」

唔好放棄自己

那些年,洪朝豐主持電台節目《日月星辰》大受歡迎,連奪數年「十大最受歡迎電台節目主持」,有否好懷念以前光輝歲月呢?他說:「我又覺得自己唔係懷念,過咗去就過咗去,懷念好辛苦,我想將訴心聲呢樣嘢攞返出嚟,喺呢個人心慌亂嘅時期,又影響收入又影響旅遊,好多理想實踐唔到,呢個時候特別需要訴心聲。」61歲的他經歷豐富,分享人生觀:「千祈唔好放棄自己,遇到困難要有龐大意志克服,但同一時間要順其自然,因為我見過有人好怕死,堅持唔想離開世界係好辛苦,堅持係啱,但要順其自然。」

娛聞樂陪你走遍全球追星,即Like「娛果」FB 專頁!
BannerBanner