YouTube女神丨嘉盈曾三度離家出走被判入女童院 受欺凌後成就第二人生

更新時間 (HKT): 2021.06.07 00:00

早前連登舉行YouTube女神選舉,身形嬌小但上圍豐滿的嘉盈BB,被指是MK女神。嘉盈BB說話直白不造作,鏡頭前盡情展示她的流利粗口,雖然她坦言MK予人難登大雅之堂的感覺,但嘉盈BB說:「呢個就係我。」

我們與女神之間,明明隔住個mon,基本上是兩個世界的人,但是透過這個小小的屏幕,輕易地把那虛無飄渺的距離拉得很近,真與假,虛與實之間,讓人走進女神的生活。到底現實世界的她們是怎樣?《蘋果》邀得嘉盈BB現真身,赤裸裸地揭開過去,她說:「大家鍾意睇就睇,唔鍾意就唔好睇囉。」

女神泛指外貌出眾的美女,網絡世界的女神更是五花八門,性感、文青、山系、可愛,各式各樣的標籤,嘉盈BB被貼上「MK女神」的招紙,她說:「好多人話我MK,其實我冇唔開心,MK都係本土文化,MK冇咩負面嘢呀。不過MK畀人感覺難登大雅之堂,我知道自己學歷唔高,但係我都好努力,吸收唔同文化同知識,我咩都識少少,唔叻,但係識少少就夠啦。」正如嘉盈BB所說,她只是生活上經常會遇到的女生,只是剛好走到幕前的不多:「事實上,我冇經過包裝,講嘢唔經大腦。不過你話負評嗰啲,我梗係會嬲啦,所以我會逐個X返佢哋,嗌交,我從來都冇輸過。打字快、轉數快嘅,歡迎挑機,哈。」

嘉盈BB自言小時候很可愛,深得父母和老師寵愛,後來父母離異,沒有了母親時刻呵護,她感覺自己有如落難公主:「父母依然好錫我,不過冇阿媽幫我打扮,啲校服巢𠵼𠵼又黃紺紺,好似不能自理咁,頭髮都冇人幫我紮,嗰時就變到好想做啲嘢,去引人關注。同老師鬥嘴、郁手郁腳,一個垃圾桶『車』埋去,喺學校食煙,總之就三五成群冇個好人。」但她自言當時的壞,只為了引人注視:「我唔係心地差,唔會害人。」

當時她曾經三度離家出走, 最終嘉盈BB被法官判入屯門兒童及青少年院(男女童院):「嗰時好細個,仲未夠18歲,所以法庭有權將我送到男女童院,要將我再教育,就好似年輕版教育營咁。」雖然日子難捱,被其他院友淋湯、晚上故意製造噪音:「嗰28日好煎熬,假如你表現唔好,法庭有機會再掟你入去,所以我咬牙切齒咁度過呢28日。不過呢28日,其實我學咗好多,因為喺入面冇嘢好做,我培養咗睇書嘅習慣;第二, 本來我係個好良善嘅人,但事實上我喺入面,學識咗點樣保護自己,我唔會蝦人,但係我都唔會再俾人蝦,你令我唔開心,我都唔會畀你開心,呢個道理沿用到現在,都好適用於生活。」落難公主急速長大成小小鬥士,令嘉盈BB明白了很多,與其說男女童院是再教育營,倒不如說是提早面對現實的殘酷。

她明白世界上總有人不喜歡自己,幸好現在的嘉盈BB,已經可以一笑置之:「而家諗返呢28日覺得好好笑,當時好痛苦,但係都好好笑,亦更加珍惜同屋企人嘅關係。呢28日入面,其中一日屋企人會嚟探我,見到屋企人嗰下,我即刻流眼淚,好感性,自從嗰次之後,我同屋企人關係好咗好多。 」她憶述離開男女童院那刻,她很高興:「好開心,好像重獲自由咁,所以大家要好好珍惜自由嘅可貴。」

經典的勵志故事,自然有變好的轉捩點,讓嘉盈BB變得更好的,是她就讀的第二所中學:「我第一間中學成績比較好,因為我追唔上,就嚟咗呢間中學,呢度係我人生中數一數二最快樂嘅日子,因為啲同學相當幽默、相當善良。因為同學啲成績都唔太好,我讓佢哋單手都考到第一,喺呢度搵返啲自信心,同啲同學又啱傾,佢哋係我返學嘅動力,係呢度我慢慢變成願意返學同享受返學嘅人。」

性感無罪:從未利用過性感來賺一分一毫

擁有豐滿上圍的嘉盈BB,喜歡作性感打扮,她說:「我從未利用過我嘅性感來賺一分一毫,我性感係覺得咁樣靚,如果今日有件樽領衫,我覺得靚,我都會着,但係上圍豐滿嘅女仔,露鎖骨睇落會瘦啲,呢個就係穿搭技巧。」女性有身體自主是理所當然,嘉盈BB直言不擔心因為性感招惹意圖不軌的對象:「我從來唔擔心男仔嘅企圖,我係個有眼光嘅人,我唔覺得自己會愛上玩家,冇可能揀錯。」她很懂得欣賞自己,同時亦了解自己的缺點,嘉盈BB說:「性感嘅軀殼係bonus,我好欣賞自己個靈魂。」她的自信、率直和坦白,或許就是最讓人喜歡的地方。

嘉盈BB並非空有一副好身材,對於自己未來的目標,她很清晰:「我淨係想賺好多錢,我唔需要同權貴鬥,但係至少可以幫助比我弱小嘅人,冇辦法,呢個世界就係用錢嚟衡量力量。如果我有多啲錢,就可以保護我想保護嘅人同社群。」身材雖然嬌小,目光卻伸展到無限遠。

或許很多人眼中,主觀地認為MK就是地踎、低俗,MK妹更直接等於麻煩公主病港女;但面前的MK女神嘉盈BB,有身材有思想,有性格有義氣,絕對為MK兩字賦予正面的定義,亦讓線下的她比線上的更吸引、更有魅力。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner