聯同梁詠琪、鄭中基演一家人 
君如為Edan紓壓:我跟你學嘢

更新時間 (HKT): 2021.06.08 02:00
■(左起)Edan、梁詠琪、吳君如及鄭中基昨日為新片開鏡,四人今次將飾演一家人。

人氣男團MIRROR不少成員近日都進軍影圈,盧瀚霆(Anson Lo)早前為《假冒女團》開工,姜濤亦被指會與毛舜筠合作拍戲,而呂爵安(Edan)就獲監製吳君如睇中,邀請拍2022年賀歲片《闔家辣》,Edan與君如、鄭中基、梁詠琪、鄒凱光(攤叔)及新晉導演鄭晉軒等昨日在屯門出席新片開鏡發佈會。

非一般小鮮肉

君如表示聽人講Edan好搞笑,但這部戲都要有感情戲,所以邀請Edan試鏡:「我有啲驚,試MIRROR鏡喎,係咪作死呀!但佢喺戲入面同我有好多親密嘅感情戲,花姐帶佢上嚟試鏡,然後細細聲同我講『君如,如果試咗,佢唔得,唔使硬用佢。』不過我試完又幾鍾意佢喎。」之後Edan與君如、梁詠琪及鄭中基一起受訪,君如不肯透露各人在片中角色,只表示飾演一家四口, Edan作狀說:「我演佢阿哥!」獲君如讚「識講嘢」。其餘時間Edan好少搭嘴,鄭中基笑指要教他「𢱑水吹」,Edan說:「都好重要㗎,學習緊。」

Edan受訪時坦言今次首次拍電影有壓力,但抱住學習心態參演,君如聞言即說:「唔好咁謙啦,我跟你學嘢就真啦!真係㗎,佢乜嘢角色都肯做,以前啲小鮮肉又話唔可以做某種角色。」君如又透露:「佢始終新人,都擔心拍喊戲,我叫佢唔使擔心,我哋好多高手喺度。」君如又說今次為角色面試見過好多人,最終決定揀Edan:「我覺得佢嘅年紀好啱,又睇過佢好好笑嘅短片。」

再合作當敍舊

講到促成這部賀歲片,君如透露有次與陳可辛食火雞餐,恰巧遇上鄭晉軒,君如說:「佢用咗一個鐘頭,講佢喺疫情期間同屋企人發生嘅事,佢講到好好笑,我問佢可唔可以拍成電影?佢話拍得,仲識得寫,點知第一稿全部都係錯字,於是我就搵咗攤叔出山幫手。」鄭中基向來都撐新晉導演,上次拍《遺愛》不收酬勞,今次是否零片酬?君如即時搶着說:「佢話『如果係港產片又新導演,咁我唔收喇!』轉個頭佢經理人田雞就打嚟,所以𠵱家係一口價,冇托手踭!」鄭中基指跟梁詠琪已有10年沒合作,所以心態是敍舊。梁詠琪則表示今次拍戲,事前要向囡囡申請:「疫情期間都冇拍戲,大家有工開都好開心。」

娛聞樂陪你走遍全球追星,即Like「娛果」FB 專頁!
BannerBanner