ViuTV鬥大台丨張建聲上陣正面對撼方力申 憑熱誠靠經驗迎戰

更新時間 (HKT): 2021.06.08 19:34

張建聲、陳凱詠(Jace)、談善言、顧定軒(Zeno)與陳海寧(Dee姐)等今天於九龍灣出席下周一(14日)首播的新ViuTV節目《嫌疑事件簿》記者會。對於新節目對撼大台在同日同時段播出、甚至被指題材幾乎一模一樣的《死因有可疑》,主持之一張建聲表示:「有呢樣嘢?如果兩個節目都咁精采咪得,何必比較?最緊要演員演得開心、觀眾睇得開心、有得揀。」

張建聲謙稱「冇得鬥」

問到首次拍綜藝節目的張建聲是否要惡鬥《死因》的方力申(小方)時,張建聲搞笑說:「點敢?我唔識游水,小方游得咁快,我增肥就叻啲,冇得鬥、唔使鬥,各有各啦!最緊要開開心心。」問到會否覺得《嫌疑》比較優勝?張建聲說:「我哋sell經驗,我唔係後生,有演戲同綜藝元素,會畀大家睇吓我哋嘅熱誠。」

談善言知己知彼

同樣是初次主持綜藝節目的談善言則說:「我唔知嗰邊係點,我哋創作團隊所有嘢都好真、亦會有即興嘅創作,係一個共同創作嘅節目。我都會留意吓對方,睇吓各方優勢,咁先會進步。」最後張建聲高舉V字手勢說:「Peace!Peace!」

對於兩台節目硬碰,又有指節目先由大台先開拍,ViuTV涉抄襲無綫,引起網友罵戰。張建聲則謂沒有考究,做好本份便可。他知道外國也有同類型的遊戲節目,節目內各人互相猜疑大感刺激好玩,他認為只要好玩,怎樣也無關係。張建聲更自嘲一把年紀,跟一班後生仔冇偈傾,不過會做大哥哥角色,照顧好每一位。

Jace表示節目年初已開始試鏡,所以不會有抄襲成份,不過作為演員會專心去玩,而Dee姐則謂會叫朋友收睇ViuTV支持自己。

Dee姐避談193

另外,Dee姐自爆因節目需要,向ERROR的何啟華(阿Dee)請教跳舞,問她為何不請教緋聞男友郭嘉駿(193)?她說:「阿Dee係舞蹈達人,因為我哋合作節目,所以就把握機會學嘢。」提到193最近推出新歌《睡到三點》,作為緋聞女友的她可會大力支持?她說:「點支持?」提議她可以一起睡到3點鐘,她一臉尷尬。提到有網民批評193的新歌,Dee姐表示沒有留意,但卻力撐193:「我認識嘅193係好勤力嘅,為人搞笑又靚仔,係有優點畀人發掘。」問到他們是否拍拖?她說:「感情事唔回應嘞,因為偶像都唔講感情事,我都想做偶像。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner