無綫副總經理杜之克9月2日離職 馮盈盈:做好自己等候安排

更新時間 (HKT): 2021.06.08 21:42

無綫再有人事變動,繼副主席兼行政總裁李寶安,及其「愛將」余詠珊、何哲圖離職後,昨晚傳出行政辦公室副總經理(戲劇製作及節目)杜之克亦遞辭職信請辭。而今日無綫員工收到內部通告,指杜之克將於9月2日離職。

劇集《逆天奇案》今日舉行記者會,該劇的監製劉家豪是由杜之克找他回巢開劇,不過劉家豪今日未有接受訪問。有指一直由杜之克揸旗的合拍劇將會受影響,問到同場的陳展鵬可有擔心影響《逆》劇開續集?他說︰「開續集都唔係好清楚,希望唔好有影響啦!咁多年嚟我都係第一套(指合拍劇),見網上好多人談論,每個演員都希望可以有多啲參與。」

同場的馮盈盈將接拍選美劇,有指杜之克離職會有影響,馮盈盈表示︰「不嬲都係做好自己嘅工作,其他嘅變動唔會去留意或有乜影響,專心做好自己手頭上嘅嘢就得。」可有擔心選美劇會被削資源?她謂︰「套劇未真正開拍,我都唔係得到好多資料,無論我喺入面擔任乜嘢角色都好,資源有幾多都唔係我控制,總之有工作落實安排畀我,我會專心做好。」

曾有打包道具食物

此外,新聞多多的馮盈盈,被指拍節目時「又食又拎」叫助手打包鮑魚,今日她回應時解釋說︰「我有睇報道話我打包拍攝食物,我想講番入面啲資料有錯,絕對唔係感謝祭嘅節目,而係《天天開運王》。拍攝時有打包到一啲煮咗嘅菜式,因為每集都煮到成枱餸,時間又太匆忙冇人食,好多時都倒晒,我覺得好浪費。台前幕後工作人員都覺得唔好浪費食物,要珍惜,先打包返屋企,我覺得節儉、環保,都唔係一件壞事。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner