太極為演唱會變「90後」 Joey Tang自嘲老樣趕客

更新時間 (HKT): 2021.06.09 19:00

太極樂隊將於8月7-8日在紅館舉行演唱會,一眾隊友近日忙於演唱會進行籌備工作,他們更討論一系列的宣傳廣告,今次他們廣告片大玩新意思,齊齊變做「90後」,不過這個「90後」是指90「歲」後!

主音雷有輝大爆隊友Ricky「出蠱惑」,要求設計師為他「做手腳」:「我哋每一個都變晒90歲嘅樣,淨係佢一個人揀張咁後生嘅相,睇落同依家都冇咩分別咁,可能佢都知自己擺唔耐,未必有90歲命啩?其實變老好容易,我哋做少幾次Mask、唔化妝都可能有呢啲效果。」

看到自己個老樣,Joey Tang笑言有點被嚇親,還說有「趕客」成份:「初初諗邊個咁大整蠱啊?原來係由老變後生,咁都好啲,因為有比較,而家睇落仲靚仔咗好多!今次個演唱會有好多Gary生前嘅好朋友都話想幫手,所以好多人都嚟支持。呢一刻我哋仲未綵排,仲未習慣冇咗佢,每一個細節都預佢一份。」

Hi-Fi德就叫太極Fans積極撲飛:「而家世界日日改變,呢個騷都因為疫情問題延期咗幾次,都唔知下次再聚係幾時嘅事,可能要到30年後先有機會搞,到時我哋仲未死又行得郁,再唱畀大家聽囉!」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner