ERROR「進軍」荷李活 保錡離譜:同Marvel講我要做超人

更新時間 (HKT): 2021.06.09 18:50

ERROR「自肥」與Mike導合作無間,人氣高企,絕對係搞笑男團!成員梁業(肥仔)、何啟華(阿Dee)、郭嘉駿(193)及吳保錡發展不俗,193更因作風寸寸貢成功上位,變ViuTV另一人氣王,即將加入《晚吹》系列。

193將跟《最後一屆口罩小姐》冠軍「浩南」鄭伊琪及曾參加《美選D.n.A》的譚凱倫(Helen)主持節目《晚吹-戀講嘢》(暫名),化身愛情專家,幫助女士解決愛情煩惱及抒發情感,甚至探討示愛、撬牆腳、第三者、性愛關係、性取向等難題,更會邀請有愛情問題的觀眾到錄影廠講戀事,193會盡力為女觀眾排憂解難,而每集嘉賓要自備一件與自己個案相關的物品即場放上「忘憂架」,物品存放至尾集,最後一集將會把26件物品一次過當場「處決」,代表當事人要忘記過去向前看。

ERROR聲演《保鑣救殺手2》

ERROR成員亦百足咁多爪,193聯同ERROR三子為荷李活新戲《保鑣救殺手2》宣傳片配音,被問是否第一次配音,肥仔指他們之前試過casting迪士尼動畫配音,193笑說:「都難㗎!我唔知(成唔成功),因為疫情關係,有好多原因。」

四子一向被指說話有懶音,保錡卻形容他們配音很好:「絕對係前無古人,後無來者,就算專業配音員都『配唔到我哋嘅成就』。」肥仔笑言:「有咩網絡攻擊保錡,記住係佢一個人講!」193更叫專業配音員可以在網上聲討保錡,保錡解釋:「係本人立場,因為佢哋絕對唔敢咁配,如果認真得嚟,我又配得咁廢,得我做到。」193笑說因為有大多粗口。

講到佢哋好似「首次進軍」荷李活同三大國際巨星,阿Dee講反話:「叫大家唔好tag荷李活。」肥仔續說不要被三位仁兄知道ERROR的存在,保錡更離譜:「或者我希望佢哋幫我,同Marvel講畀一個超人我做。」肥仔爆笑:「Marvel冇超人,你可以做曱甴俠!」保錡死撐再兜:「香港超人,因為佢哋好鍾意香港取景,幫我整個GG俠嗰啲。」193叫保錡做沙律俠:「只係食沙律,仲要係咁食,一食沙律就有力。」阿Dee叫保錡做「美國巨腸」,保錡續道:「美國巨腸,素食主義。」

193:公司鑊鑊亂接job

被問有否睇《保鑣救殺手》第一集,193及保錡相當興奮表示有睇,當肥仔問第一集內容,193及保錡異口同聲:「就係保鑣救嗰個殺手囉!最尾救咗佢,冇人死,劇情類似畀人暗殺……一定有錫。」保鑣在宣傳片中聲演心理醫生。他們提議可以拍香港版,而且成本低,肥仔提議戲名《保錡救殺手3》,「殺手3」就是193、保錡演保安,阿Dee演殺手老婆。四人的宣傳片中看到193繼續發揮其寸爆本色謂:「公司鑊鑊都亂接job!」在旁的三子即嚇呆,另外見阿Dee配音時疑似爆粗。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner