YouTube女神︱黑面女神Ah Gi經歷喪兄之痛 學懂及時行樂但求一生無悔

更新時間 (HKT): 2021.06.09 06:00

驟眼看上去與陳慧琳有幾分相似的樊沛珈 (Ah Gi),與眾多網上女神最不同的地方,就是她的照片十居其九「口黑面黑」,然而冰山美人的形象,令她深得網民喜愛,早前更被封為黑面女神。

黑面比笑面更好看

Ah Gi早前接受《蘋果》專訪,為自己的黑面解畫:「其實我只係笑嗰陣好樣衰,所以影相嗰陣唔係成日笑,但其實我成日都笑,有睇過我啲片就知我成日笑。我覺得(黑面女神)呢個名幾特別,我成日都睇連登,都好多謝網民,唔係負評已經好感恩。」能成為KOL大概總帶着強大的心臟,面對負評,Ah Gi會視作參考:「可能真係有檢討空間,點解人哋會有咁嘅感覺呢?我唔會因為咁而嬲,始終對方唔係直接識我,都係講佢哋嘅主觀感受啫。」她又自爆小學階段是肥妹仔,自覺當時很醜,直到中學開始才注重儀表:「中學嗰陣唔算多人追,係有嘅,如果話冇就太假啦。」

現時為YouTube頻道「啱Channel」成員的Ah Gi,由《蘋果》動主播走到YouTube的大舞台,她說:「我細個好想做DJ,但係我畢業之後,以前嗰啲DJ選拔比賽冇晒,之後見到《蘋果》動主播比賽就去參加,因為覺得幾得意,嗰啲賤聲旁白、啲稿又好抵死 。而家嘅工作就比較自由,我都幾鍾意呢份工,因為有時會有演出機會,我發現自己對演戲都幾有興趣。但係我終極希望係同朋友夾band,不過呢個都係後話啦,呢個年代夾band賺唔到錢,所以要照顧咗自己生活,先再去諗自己最想做嘅事。」

哥哥意外離世

網片中的Ah Gi玩得很放,說話亦不造作不會刻意嗲聲嗲氣,沒甚麼「美女包袱」,與冷酷外表大相逕庭。她坦言從前只是想找份好工作,安安份份做到退休,但現在思想改變了:「有咩目標想做就去做,唔好遲疑,唔好令自己後悔。」讓Ah Gi改變的,是12年前哥哥的離世。

受訪當日,Ah Gi重遊兒時居住的黃埔花園:「呢度真係冇咩點變,我細個成日同哥哥喺樓下公園玩,細個嗰陣感情好好,一齊打機,總之去邊都一齊,直到中學就冇以前咁好,佢有佢嘅朋友,我有我嘅朋友,好自然,我諗好多人都係咁。」哥哥因為交通意外離世,令全家人崩潰,亦因此改變她的價值觀,憶起當時的點滴,Ah Gi不禁在鏡頭前流淚:「我實在唔可以形容當時嘅心情,傷心嘅程度實在太高,所有家庭成員都迷失咗,好似電影先會出現嘅情節,竟然喺自己身上發生。從來冇諗過第一次出席嘅葬禮,竟然係自己嘅親哥哥。後來我哋一家搬離咗黃埔,因為驚,點講呢……我喊唔係因為未接受佢嘅離開,只係一提起佢,加埋喺呢個地方令我觸景生情。當你經歷過呢種事,你會覺得好多事都唔再重要,唔重要嘅意思,係應該把握時間做自己鍾意嘅事。」

Ah Gi直言哥哥離世前,與家人的關係不算親密:「但係因為哥哥嘅離開,關係變好咗,對父母嚟講,只係得番我一個女。記得哥哥啱啱離開嗰陣,我好驚自己會死,如果連我都有事,咁爸爸媽媽點算?成個腦都係呢啲問題,去旅行搭飛機都驚,出街又怕俾車撞死,聽落好可笑,但係我真係驚,因為生命真係好脆弱。」

趁有時間盡做

現在的她,認為只要找到喜歡的事便應該去做:「除咗作奸犯科嘅事,所有嘢都無牴觸,趁有時間早點做。除咗想同朋友玩音樂,我都好想演戲,我對演戲都有興趣,而家嘅工作都有涉獵到微電影,我都幾鍾意,如果日後有機會拍劇或者拍戲,我會好樂於嘗試。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner