非常人●非常事丨發姐發媽火星撞地球 做攝記獲弟贈名貴相機(白露眉)

更新時間 (HKT): 2021.06.09 00:00

周潤發胞姐周聰玲告訴我本月7日到13日在沙田大會堂舉行的「山水有情攝影展」,她有作品參展,叫我有時間可以去看一下。認識玲姐是因為發哥介紹,他告訴我,他的胞姐也是熱愛攝影,每日就四處去獵影,剛巧於1997年我當時做的報社有一名攝影記者空缺,我就打電話問玲姐:「我報館有攝記空位,你有冇興趣去做?有就隨時可以嚟返工!」玲姐回我:「你真係請我?我唔知自己做唔做得嚟喎!但你肯畀機會我,我會努力去做。」

發哥送相機賀胞姐

後來發哥在媽咪口中得知後,曾經打來問:「你真係請我家姐呀?佢應唔應付到㗎?」我說:「反正佢每日都係無無聊聊四處去影相,不如畀佢試吓寓娛樂於工作仲有意思。」發哥雖然已是大明星,胞姐去當記者,他沒半點介意,而且還送了一套名貴的攝影器材給玲姐方便工作。不過玲姐比較粗心大意,有次出外採訪,她把整袋攝影器材放在一邊,然後跟行家去為某某明星拍照,事後整個放相機的袋不見了,其他行家幫忙找都沒發現,回到報社,她沒把這事告訴我,事後我是從發哥口中才得知:「送套相機畀佢,唔夠幾個月已經唔見咗,佢真係好鬼大意。」我叫發哥不要再買太貴重相機給玲姐工作,因為當時跑新聞刊報紙的照片要求不是很高,不必買太貴重的相機。

雖然事後我有提醒玲姐出外拍照時,不要拿太多東西,切忌把隨身物品四處放,因為容易給人順手牽羊,玲姐表示:「我都冇諗到影咗一陣相返去想攞番個袋就冇咗,我同發仔講,佢問我要唔要再買新畀我,我話唔使啦!各人有各人嘅工作,冇理由成日煩到個細佬,佢已經幫我好多,呢個細佬對屋企人已經好照顧,我哋每個兄弟姐妹都有樓住,我住嗰層樓都係佢買畀我住,佢對我嘅照顧已經好足夠啦!」

生活依舊低調

玲姐和發哥童年時代因家境貧困,在南丫島生活過得非常清苦,平時要跟阿媽出去賣茶粿。玲姐讀到小學六年班,15歲就離開南丫島出九龍找工作,做過很多不同的工作,又去過酒樓賣點心,一直寄住在砵蘭街與婆婆一起生活。發媽就主力照顧弟弟和妹妹們,後來弟弟憑個人努力成為一位國際巨星,玲姐是感到很驕傲,但她從不會去沾弟弟的光,依然是過着自己的逍遙自在低調生活。

從來沒有以明星胞姐自居的玲姐,生活簡單樸素,不過衣着隨便得我都受不了而跟她說:「玲姐,你今晚做嘢嘅場合比較高貴,你衣着要執番好少少,唔係我擔心酒店唔畀你入場。」玲姐答我:「知道啦,為做嘢我會執正啲去。其實平時我着衫就係要舒服自然,我唔覺有問題,但有次我去博物館被當成露宿者,爬山又被警察查身份證,以為我係偷渡客,我同阿媽講,佢話我平時着到乞丐咁,唔俾畀人誤會先奇怪。」

發媽上門執屋吵大鑊

有次在發哥九龍塘寓所,我見到發媽,她知道我是玲姐上司,發媽跟我說:「好多謝你請我個女做嘢,等佢有啲寄託,佢同我講做得好開心,我就叫佢做好啲唔好丟個細佬架,呢個女做嘢好大頭蝦,我都頂佢唔順,你有冇見過一個女仔屋企成屋都係雜物,淨係得瞓個位係乾淨嘅?我上到佢屋企見到咁亂,真係抵唔住頸,我咪落手幫佢執屋,打畀佢問呢件可唔可以丟?佢話唔丟得,乜都話唔丟得,點會唔成老鼠屋?話親佢就梗係同我嗌交,硬頸到死!性格同發仔相差好大,發仔啲嘢整整齊齊、乾乾淨淨,唔要嘅嘢就送畀人,話佢唔啱嘅嘢佢一定聽話去改。」

發媽與玲姐表面關係就好像火星撞地球般,容易一言不合就拗起來,工作之餘有時與玲姐聊天,我曾勸她不要經常與母親爭拗,媽咪不關心你,就不會為你家打掃,又關心你工作情況。她說:「我講乜佢都唔啱聽嘅,所以我已經唔會同佢拗啦!明知佢咁要強性格,我咪諗住少啲見就減少磨擦,點知佢會嚟我屋企幫我執屋,咁我擺得屋企嘅嘢梗係有用啦!咁每個人有自己嘅一片天空,佢有佢嘅生活方式,我有我嘅生活模式,點解一定逼人行佢嗰套呢?我成日同阿媽講,我開心咪得囉!我都咁大,你唔使操心我啲嘢啦!」

玲姐做了幾年記者後,後來因年紀大跑不動就沒有再做,之後在發哥的家人飯局中,曾經碰過玲姐,問起她近況,她說:「而家唔使返工,我咪每日跑去公園影蜻蜓囉!最緊要係等條尾直晒嗰刻嚟影,有時一影就幾個鐘。你知我生活好簡單,有時一日都用唔到100蚊,以前做嘢有啲積蓄,生活唔成問題。自己搞得掂,唔想成日煩個細佬啦!」自從母親離世,加上疫情有限聚令,她與發哥等家人已經有頗長時間沒有見面:「而家電話咁方便,有乜事咪打個電話囉!唔一定要見面,我知道發仔日日同人去跑山,好鬼快活,而我自己日日去影相都好自在,我要求嘅生活係好簡單,完全冇物質要求,名利睇得好淡,而家一個人生活,無拘無束,繼續行得走得到死,我就好心滿意足。」

借影相開解洪朝豐

2006年期間,前電台DJ、藝人洪朝豐,當時患上抑鬱狂躁症,一度陷入「豐狂歲月」,情緒大起大落。後來因為他在粵曲界認識玲姐,玲姐知道他有病,所以提議他一起去濕地公園拍照,對他的病情有了好大幫助,玲姐曾對我說:「去到大自然,人都心情好啲,我成日叫佢放鬆同開懷,好好去享受人生,唔好咁執着。去多幾次之後,我發現佢開朗咗好多,佢仲多謝我!」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner