YouTube女神丨阿冰原來係舞林高手 街頭被集郵感動到想喊

更新時間 (HKT): 2021.06.08 00:00

想在網絡做女神,除了有美貌有身材,走鄰家路線的亦有機會脫穎而出。「GFable女神」阿冰(吳冰)雖然稱不上是標準美人,但她的娃娃笑甜美可人,加上單純的外表,自然吸引不少網民關注。早前阿冰接受《蘋果》專訪,帶我們去她成長的屋苑,分享童年往事:「呢度係位於青龍頭嘅屋苑,10歲前我都住喺呢度。細個同屋企人關係一直都好好,到而家都好好,我哋成日有講有笑。我屋企算係幾嚴厲,但就唔係樣樣嘢都嚴厲,佢哋對我喺外面嘅事嚴厲,喺屋企入面就唔嚴。即係如果我將啲膠水髹滿晒成幅牆,我係唔會俾人鬧,但係如果我問可唔可以出去玩,係唔可以嘅。我去到差唔多中學畢業先可以同朋友去街,嗰時先識搭地鐵,因為之前都係跟住屋企人出去,直到可以同朋友去街,先知道原來可以咁得意。」

現時喜歡運動的阿冰,原來小時候是舞林高手,曾學習芭蕾舞、爵士舞及土風舞:「都係我自己揀嘅,芭蕾舞同爵士舞,我都考到六級,淨係差兩級就考到八級㗎喇,點解我冇堅持落去呢?而家諗返都覺得有啲蝕,因為嗰個老師真係好惡,次次考試或者考級之前,佢都會鬧到我哋喊,跟住我就好驚,咁就冇再學落去,放棄咗。我同屋企人講我唔學喇,佢哋話唔學就唔學囉,就係咁。」長大後喜歡做運動,早前曾經學習街頭運動,阿冰更即席示範倒立,柔弱的外表下,亦有活力一面。

修讀電影的她,笑言讀書時候欠缺拍攝資金,只好一人分飾數角,做幕後之餘更要擔任演員,因而讓她愛上演戲。現時,阿冰除了參與小薯茄的幕前演出,她亦要負責剪片及經營個人YouTube頻道,她憶述經朋友介紹到小薯茄試鏡:「Casting嗰陣都幾好笑,嗰時坐我前面係高Ling、阿富同琪琪,琪琪嗰陣仲飲緊珍珠奶茶,我就諗都幾搞笑,有女仔都好,因為我身處嘅地方,係有女仔嘅環境會舒適啲。之後高Ling叫我試幾個表情睇吓,再問吓我平日嘅嘢,而家做緊咩,咁就完成咗。過咗幾日,我就收到富哥個WhatsApp,問我得唔得閒拍片,嗰次應該係我第一條小薯茄嘅影片,就係講『賣書』。」將來,阿冰希望在演藝上作不同嘗試,特別是拍廣告及MV:「雖然兩樣我都試過,但係自己對呢方面比較有興趣,仲有舞台劇、電視、電影,所有嘢都想試。」

對於被網民譽為YouTube女神,阿冰最感動是在街頭被集郵:「見到佢哋真係好開心,笑得好真心,我就覺得好好。你哋見到我呢個咁普通嘅人,都已經可以開心成日,有時見到佢哋咁開心,真係想喊。」但是對於熱情的支持者,阿冰坦言有點害怕:「最近開始多咗人認得我,但係我係需要私隱比較多嘅人。最近我有個小方法,就係拍完Story會離開咗現場先post,你哋就唔會知道我真正嘅位置。因為有時post完,有觀眾會留言話嚟搵我,如果我收到呢啲message,我會有啲驚,要快啲走。」至於網上的負評,阿冰表示會接納意見:「如果係我可以改善嘅嘢,例如咬字,我會留意吓,但如果係人身攻擊,咁冇辦法,我可以點先,係咪?」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner