貼童年照多謝媽媽 
Ian 28歲生日 粉絲擲30萬搞驚喜

更新時間 (HKT): 2021.06.10 02:00
■昨日是Ian28歲生日,他要在工作中度過。互聯網圖片

現在MIRROR成員可謂集萬千寵愛在一身,fans都出盡「法寶」為博偶像一笑,繼上月尾姜糖豪花數十萬為姜濤賀牛一,昨日是Ian(陳卓賢)28歲生日,一班「Hellosss」就早在約一星期前已揼本在11個巴士站落廣告慶祝,設計一系列的Ian生日精品,又在觀塘商廈舉行預約制的生日party。而Ian雖然要在工作中度過,但也不忘在Ig貼童年照,留言道:「多謝陳媽媽,多謝各位的祝福。」身為女友的盧慧敏沒有公開祝賀,繼續將感情事低調處理。隊友Anson Lo(盧瀚霆)、Edan(呂爵安)等就出post祝賀,圈中好友余香凝與張繼聰也送上祝福。

Hellosss有段古

熱愛Ian的Hellosss在觀塘開了一個Happy Moment小組讓fans相聚,設有扭蛋機、影相區及派發應援物等,豪花30萬元。早前《蘋果》訪問六位fans club成員,只見一班Hellosss在一個小小的辦公室佈置準備一連13日的慶祝活動,約有700名fans參加。身為Hellosss的阿Cat說:「兩年前都有同Ian開過生日會,但係疫情關係所以今年冇得開生日會,但係都想同其他fans一齊分享呢個開心嘅時間,今次組織咗呢次生日會,扭蛋機裏面係一啲關於生日嘅小禮物,又有一個photo booth可以同Ian合照,而喺巴士站嘅廣告燈箱,都係希望多啲人知道Ian,一齊慶祝吓。」

而Hellosss的由來是有人問Ian如何稱呼fans,他以為是問如何跟fans打招呼,就說「Hello」,結果Ian的fans自此成為「Hellosss」。

辦預約制party

不少Hellosss在昨日、偶像生日的日子到觀塘參加預約制的生日party,由傍晚開始不斷有fans在門外場隊入場,開心玩扭蛋、合照兼購買應援物,其中Cherry、Sally與Zoie結伴前來,她們各花上幾百元購買應援物,更大讚偶像唱歌好聽兼有才華,又送上祝福:「祝Ian生日快樂!希望可以作多啲歌同唱多啲歌畀我哋聽、拍多啲劇,我哋永遠支持你!」

娛聞樂陪你走遍全球追星,即Like「娛果」FB 專頁!
BannerBanner