【非常人.非常事】發哥胞姊與母火星撞地球

更新時間 (HKT): 2021.06.10 02:00

周潤發胞姊周聰玲告訴我本月7日到13日在沙田大會堂舉行的「山水有情攝影展」,她有作品參展,叫我有時間可以去看一下。認識玲姐是因為發哥介紹,他的胞姊也熱愛攝影,剛巧於1997年我當時做的報社有一名攝影記者空缺,我就打電話問玲姐:「我報館有攝記空位,你有冇興趣去做?」玲姐回我:「我唔知自己做唔做得嚟喎!但你肯畀機會我,我會努力去做。」

後來發哥曾經打來問:「你真係請我家姐呀?佢應唔應付到㗎?」我說:「反正佢每日都係無無聊聊四處去影相,不如畀佢試吓寓娛樂於工作仲有意思。」發哥雖然已是大明星,胞姊去當記者,他沒半點介意,還送了一套名貴的攝影器材給玲姐方便工作。不過玲姐比較粗心大意,其後我從發哥口中得知:「送套相機畀佢,唔夠幾個月已經唔見咗,佢真係好鬼大意。」而玲姐坦言:「我都冇諗到影咗一陣相返去想攞番個袋就冇咗,我同發仔講,佢問我要唔要再買新畀我,我話唔使啦!冇理由成日煩到個細佬,佢已經幫我好多,呢個細佬對屋企人已經好照顧,我哋每個兄弟姊妹都有樓住,我住嗰層樓都係佢買畀我住。」

發媽上門執屋吵大鑊

有次在發哥九龍塘寓所,發媽跟我說:「好多謝你請我個女做嘢,佢同我講做得好開心,我就叫佢做好啲唔好丟個細佬架,呢個女做嘢好大頭蝦,你有冇見過一個女仔屋企成屋都係雜物,淨係得瞓個位係乾淨嘅?我上到佢屋企見到咁亂,我咪落手幫佢執屋,打畀佢問呢件可唔可以丟?佢乜都話唔丟得,點會唔成老鼠屋?話親佢就梗係同我嗌交,硬頸到死!性格同發仔相差好大,發仔啲嘢整整齊齊,話佢唔啱嘅嘢佢一定聽話去改。」

我曾勸玲姐不要經常與母親爭拗,她說:「明知佢咁要強性格,我咪諗住少啲見就減少磨擦,點知佢會嚟我屋企幫我執屋!咁每個人有自己嘅一片天空,佢有佢嘅生活方式,我有我嘅生活模式,點解一定逼人行佢嗰套呢?」而自從母親離世,加上疫情有限聚令,玲姐與發哥等家人已經有頗長時間沒有見面:「有乜事咪打個電話囉!唔一定要見面,我知道發仔日日同人去跑山,好鬼快活,而我自己日日去影相都好自在,我完全冇物質要求,𠵱家一個人生活,無拘無束,繼續行得走得到死,我就好心滿意足。」

2006年期間,前電台DJ、藝人洪朝豐患上抑鬱狂躁症。後來因為他在粵曲界認識玲姐,玲姐知道他有病,所以提議他一起去濕地公園拍照,玲姐曾對我說:「去到大自然,人都心情好啲,我成日叫佢放鬆同開懷,好好去享受人生。去多幾次之後,我發現佢開朗咗好多,佢仲多謝我!」

撰文:白露眉

本欄逢周一、四刊出

【非常人.非常事】

縱橫娛樂圈35年的資深記者,看盡圈中人情冷暖;這年頭,地球病了,娛樂圈轉慢了,白露眉是時候出手了,分享「非常人.非常事」,跟「蘋民」圍爐取暖。

娛聞樂陪你走遍全球追星,即Like「娛果」FB 專頁!
BannerBanner