YouTube女神丨童顏蔡曉童自嘲「哈比」身形 到法國義教廣東話

更新時間 (HKT): 2021.06.11 06:00

大眼妹蔡曉童(童童)稚氣齊蔭、包包面加上身形嬌小,在網絡世界人氣超強,來自YouTube頻道小薯茄的她,早前被網民選為YouTube童顏女神。然而,童童對於被封女神級並不認同:「我唔覺得自己係女神,我對女神要求好高,我可能咁啱係你們心目中嘅哈比女神。」

女神之條件

女神不限於外貌和身形,更重要是她的智慧。對於外界的讚美,童童心存感激,但她笑指自己心目中的女神,與大眾所指的女神屬不同派別:「女神應該同我哋想像一樣,又高又瘦又靚,好似林青霞之類。如果唔講樣,我覺得女神應該有自己主見,好似希臘女神當中,大家認為雅典娜(Athena)係女神,但係最受大家歡迎係穀物女神(Demeter),因為佢可以提供食物、食糧。我覺得做到女神,應該畀到啲嘢人哋,喺精神上或者說話當中,可以畀到啟發大家,或者大家見到嗰個人,會從中得到力量,咁先可以叫做女神。」

體內住了一顆老靈魂

至於她的可愛童顏,童童坦言經常被問是否已成年,她說:「我唔會介意,大家可以隨便問,但我唔覺得自己特別年輕,自問性格上亦唔係好可愛。我個樣年輕,但係我擁有老靈魂,我有自己嘅想法,唔係特別鍾意年輕人玩意。」童童自嘲是個比較老態、慢半拍的人,但不抗拒童顏形象:「我唔會特登打扮得年輕啲,反而希望大家覺得我成熟啲,起碼係適當嘅年齡,我已經二字頭啦。」

法國義教

稚嫩的外表下,埋藏着童童的大世界,她喜歡挑戰,勇於嘗試和學習,因此讓她學會日語、法語、德語和西班牙語等多國語言:「我唔係精通所有語言,只係想睇吓自己對邊種語言最有興趣,最後發現自己對法語情有獨鍾。」童童更自稱是三分一個法國人,因為她在當地生活過:「係因為法文我先鍾意法國,唔係因為法國好浪漫,而係去咗法國,先發現冇我想像中差。第一次去法國嗰陣,唔係得我一個人去,第二次就覺我係時候闖一闖,我唔係去玩,我喺當地義教,同當地小朋友傾偈,雖然佢哋覺得我好矮,好似仲細過佢哋嘅小學生。」但憑她徹底的勇氣,最終亦不辱使命,成功在法國推廣廣東話:「我係越級挑戰咗自己,我覺得幾開心,會周圍同人講,好威。」

自揭野生捕獲點

受訪當日,童童帶《蘋果》遊走自小成長的地方——荃灣,長期霸佔童童「蒲點」首席位置,是荃灣海濱公園內的一張長凳:「如果你哋想撞到我,我會成日都喺呢度出現。呢張係我嘅專屬櫈,仲留咗幾條凹痕喺度,我要澄清只係意外撞凹,嗰時仲要同嫲嫲一齊,我都唔敢話畀佢知。點解我成日會喺呢度坐呢?因為呢度有海,我住喺附近嘅,有時候腦閉塞或者唔想留喺屋企,就落嚟坐吓,我試過拎埋電腦同hard disk喺度剪片,我會喺度流連到好夜。大家夜晚冇嘢做可以嚟呢度坐吓,幾好環境。」

擁有老靈魂的童童,還介紹她在荃灣的購物熱點:「就係呢個鱟地坊小販市場,我會叫呢度做川龍街,因為細細個已經咁叫,嗰時屋企人會帶我嚟買衫。呢度有好多返學嗰時着嘅底衫、打底褲、襪,以前唔會喺大型百貨公司買,但係會喺呢啲平民地方。」童童憶述這種傳統街市的種種,下雨天一地濕漉漉的紙皮,架起鐵皮簷蓬,這些都是草根小店特色,童童說:「細個最想買睡衣,有Hello Kitty、Melody同大口仔,超級想要,次次經過都叫屋企人買畀我。總之有咩特別嘢,都會諗起嚟呢度搵。」

最後就是對童童有重要意義的「蒲點」,人生首次踏上舞台的地方——荃灣大會堂,這個令她改變一生的舞台劇,就是兒童舞台劇《西遊記三打白骨精》:「我就係嗰隻白骨精,好妖艷,唔知點解小學嘅話劇,都可以好妖艷,我搽咗大紅色眼妝、全身紅色衫,好妖艷。 」她直言假如沒有這次的演出,很大可能不會在這裏受訪:「好似所有嘢都喺呢度開始,我好鍾意呢種感覺,令我好有表演慾。」

現時已成為YouTube Channel小薯茄三大女神之一的她,笑謂當日加入只因為「小薯茄」這個名字好聽,童童說:「我覺得我哋呢班人性格好似,我哋都係啱啱出嚟試嘅人,一齊喺起步階段,所以走埋一齊。我希望小薯茄可以發展成好大嘅公司,我哋要拍好多片,可以拍電影上大銀幕,要有屬於我哋嘅電影。」未來,童童希望繼續與小薯茄一起,更希望參與更多演出:「我想做好壞好壞嘅角色,要壞過凱婷,一次過食四、五支煙。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner