莫文蔚開騷睡袍登場邊唱邊除 騷招牌長腿瞓地扭籮跳熱舞

更新時間 (HKT): 2021.06.11 21:36

出道25年的莫文蔚(Karen)今晚在紅館舉行一連三場《絕色莫文蔚世界巡迴演唱會》,今次除了是這次巡迴演唱會的尾站外,亦是Karen最後一次舉行大型巡迴演唱會,不少藝人如劉德華、張學友、郭富城、梁朝偉、劉嘉玲、張栢芝、鄭伊健、陳慧琳、黎姿、古巨基及成龍等亦送上花籃,而黃耀明、麥浚龍、陳柏宇、草蜢、何超儀夫婦及劉天蘭等亦有前來捧場,至於莫文蔚媽媽莫何敏儀、哥哥莫理斯及Karen老公Johannes則被安排坐頭排支持。

演唱會在晚上8點36分開騷,Karen以閃閃睡袍、包頭巾及踢拖現身,唱出《婦女新知》、《婦女新知2021》為個唱揭開序幕,而她邊唱邊脫走睡袍及頭巾,最後剩下內裏的銀色短裙,騷出長腿的Karen之後又在台上與女dancers一起扭籮、瞓地跳舞之餘,又與男dancers攬攬扮談情。至於台上的巨型LED隨後則播出Karen主持版的《婦女新姿》,而片段中更有Karen教跳健康舞。

經典瞓梳化pose再現

之後着上肉色閃閃裙的Karen以唱片封面《全身莫文蔚》的經典瞓梳化pose出場,然後全程瞓在梳化上唱出《色情男女》,唱完後,她又穿上薄袍挨在紅色跑車旁唱《冷雨》。跟上次相隔16年後再在紅館開騷的Karen之後興奮地說:「我返咗嚟啦!等咗好耐,好耐。上次紅館自己開個唱都係2005年,係16年前,你哋當年邊個有嚟?有啲讀書嘅時候已經認識,有啲仲生埋仔,多謝大家,好開心開到騷,真係唔簡單,呢年幾都要抗疫,好多騷都開唔到,好開心、好榮幸開到,多謝你哋嚟,山頂嘅朋友你哋好!點都要嗌呢句。」由於今次是Karen最後一次舉行個人大型演唱會,故她亦特別珍惜這次機會:「我踏上舞台已經同自己講,無論有一萬個定係一個觀眾,都要全力以赴演出,就算得唔5成、7成觀眾,我都會用3、5、10倍力去唱。」

一向擅長彈古箏的Karen在演唱會上亦有露一手,邊彈邊唱出盧冠廷的《一生最愛》。除此之外,她亦與男dancer表演跳拉丁舞。到了唱《幻聽》時,以全紅女皇Look登場的她,戴上金色面具,坐在大紅花轎上被抬出場,有出嫁feel之餘亦帶點詭異。

到Encore時,Karen站在網球球證凳上唱《呼吸有害》,莫文蔚指《呼吸有害》得到樂壇大滿貫,故特別將裙尾設計成球網,更自諭是「網球女神look」。之後到嘉賓張敬軒出場,與Karen合唱《只怕不再遇上》及《心仍是冷》等歌曲,軒仔表示由滾石時已經是Karen的超級fans,Karen聽後即說:「好開心同張敬軒可以合唱,因為佢唱乜都得,所以唔唱佢嘅歌,唱我熟嘅歌。」而Karen又解釋選唱《只怕不再遇上》,是因為1996年張國榮邀請她到紅館合唱這首歌:「哥哥演唱會請咗我同佢唱《只怕不再遇上》,好榮幸同佢唱咗廿幾晚。」

至於大讚Karen身材好的軒仔,獲邀幫Karen除咗件網衫,張敬軒笑言:「我冇幾可除人衫,唔記得啲拉鏈喺邊。」軒仔幫Karen除衫時讚Karen好香之餘又同Karen台下老公say sorry,張敬軒說:「我好雞手鴨腳,我驚除錯扣。」非常搞笑。

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner