林家棟親授方法演技 新演員Bipin望《手捲煙》讓大眾正視南亞人心聲

更新時間 (HKT): 2021.06.12 06:00

陳健朗首次執導的電影《手捲煙》,演員除了林家棟、袁富華、白只、太保外,還起用了飾演文尼的南亞裔24歲新演員Bipin Karma及飾演文素的巴基斯坦籍11歲演員Anees,戲內戲外兩人都情如手足。兩人同樣在香港出生和成長,日常生活總遇到不少問題,常見的就是歧視。Bipin坦言想藉着這部電影表達南亞裔人士的心聲,更希望觀眾了解及正視與南亞裔人士的相處及歧視問題。

兄弟情

電影完成後,已有一年沒見的Bipin和Anees,一見面便攬頭攬頸,原本較內斂的Bipin,被Anees感染變得也孩子氣。說到在戲中要講廣東話對白,現就讀小學六年級的Anees即搶答︰「佢中文冇咁好,而家好啲啦!我教佢嘅。」同樣是學生、在明愛專上學院修讀數碼娛樂科技的Bipin,以半鹹淡的廣東話笑笑口謂︰「佢都有幫我手,劇組將劇本改成英文,大概講個meaning畀我知,我都要做功課。」

今次電影選角,可說是機緣巧合下找到他們。導演看過Bipin有份參與的短片,因而找到他,Bipin說︰「其實我有興趣做後面(指幕後),好似導演、編劇,做演員今次係第一次。」廣東話有俗語「洗濕咗隻腳」,開了頭,以後會否想繼續演戲?Bipin原來有想過繼續:「將來再有機會,梗係會,都係自己想做嘅興趣。」年紀輕輕的Anees表示他跟媽媽朋友的兒子一齊去試鏡,結果「得咗」︰「我好驚、好怕醜,拍戲嗰陣Bipin好照顧我,之後開始拍,冇咁怕。」

被林家棟嚇親

兩位演戲新丁,偏偏跟影帝級的林家棟有不少對手戲,Bipin坦言有看港產片,「知道佢係演員,但唔知道佢咁大(成就)。第一次排戲佢同我傾,想我投入角色,佢教我要了解角色背景,故事嘅行為同動機,要我自己進入狀態,我就係文尼,佢教我用方法演技。」至於Anees表示事前不認識家棟,「而家就知道佢好勁,贏過影帝。有啲緊張,佢扭我耳仔時有啲痛,但唔敢喊,因為係拍緊戲。」

在戲中Bipin都有幾場動作戲,問他可有受傷?本身有玩free running的Bipin表示拍攝時沒有受傷,反而在開拍前因弄傷腳做過手術。但戲中有一場戲令他緊張又難忘,「有場戲我俾三個人追,跑出去我撞到部車,但導演要我再natural啲,要再嚟,我決定唔望架車,差少少就擦埋身。」

香港是我家

雖然Bipin在香港出生,但他之後返尼泊爾成長,到8歲才回港生活,加上他就讀國際學校,對中文完全不懂。相反巴基斯坦籍的Anees,在香港出生並接受教育,而中文是必修科目,他靦腆的說︰「中文成績就麻麻,講廣東話都OK嘅。」談到在香港生活,小小年紀的Anees收斂笑容謂︰「啲人改我花名叫我『黑人牙膏』,話我好臭,我好嬲唔開心。」至於Bipin曾有不快感受,但他說︰「香港有好多南亞裔人士,只係同香港人膚色唔同,但大部份時間我哋都喺香港生活,我哋都視『香港是我家』。」Bipin表示今次希望藉着這部戲,讓大家了解南亞裔人士,他說︰「呢部戲好特別,我係尼泊爾,文素(Anees)係巴基斯坦,戲入面嘅表哥係印度,我哋都來自唔同嘅國家,想呢部戲反映唔同南亞人士嘅心聲。我自己都有遇過歧視,希望觀眾睇咗部戲,正視南亞人士面對嘅問題。」

-----------------------------

蘋果App大升級 更簡潔更就手!了解更多立即下載體驗

娛聞樂陪你走遍全球追星,即Like「娛果」FB 專頁!
BannerBanner