› 選擇地區
三藩市
紐約
洛杉磯
其他美國地區
香港 台灣 北美
 
2009年03月30日

日本獲釋即Call阿倫認錯
關楚耀崩潰嚎哭

面容憔悴的關楚耀前晚獲釋返港步出機場時,被近百傳媒包圍追訪。

【迷幻鴛鴦之契爺解話】上月底在日本涉嫌藏毒被捕的關楚耀(Kelvin),前晚終獲釋返港,但因其情緒仍然十分不穩定,原定明日舉行向公眾交代的記者會將押後。身為關楚耀契爺的譚詠麟(阿倫),昨透露關楚耀上周五在日本甫獲釋即親自致電向他道歉,其間更哭至崩潰,又指關父稱關楚耀今次是無罪釋放。

關楚耀和衞詩(Jill)上月底在日本涉嫌藏毒被捕,被關押32日後,關楚耀於大前日率先獲釋,至於衞詩,據悉因其行李被搜出的違禁品較關楚耀多,故目前仍被拘留。關楚耀前晚在父母陪同下由東京返港,明顯消瘦及憔悴,他向公眾道歉認錯後,乘坐警方安排的客貨車返抵父母的天后廟道維景台寓所,並接受警方毒品調查科調查。

苦口婆心 「減壓唔一定要隊草」

大批記者昨日在維景台守候,始終未見關楚耀現身,據悉他情緒仍然不穩定及十分低落,因此原定明日舉行的記者會將押後。至於關楚耀契爺譚詠麟昨日到奧海城出席大學生回饋社會行動誓師大會暨「打開心窗、共融社會」活動時,明顯因契仔獲釋返港而心情開朗,他坦言暫時可鬆一口氣,但也要「睇埋」衞詩的情況。
阿倫透露上周五晚(27日)已接獲契仔的日本長途電話,他說:「佢一離開拘留所就同我通電話認錯,佢知好錯好錯,而且喊到收唔到聲,講唔到嘢,我叫佢返嚟先講,叫佢定啲,家喊乜嘢都於事無補,今次唔係小懲大戒,係大懲大戒。」他又表示有睇契仔的返港片段,被問到見契仔消瘦是否心痛時,他謂事件發生第一日已心痛。
阿倫續說:「今朝9點再同Kelvin聯絡,佢報平安同報告一吓嗰邊點,佢話Jill仲喺嗰邊,但係電話唔方便講,其實都講唔到幾多,佢今次就冇喊,有乜嘢見面先講,但係我呢幾日就走,去甘肅做慈善。」他又指關楚耀父母可說鬆了一口氣,但契仔將來仍有很多事要面對,如前途及做人態度等問題,但他不會叫契仔作出承諾,阿倫說:「承諾都冇用,行動最實際,減壓唔一定要隊草,可以夏枯草、雞骨草同冬蟲草都得,呢個唔止同佢講,係對各行各業嘅年輕人講,唔好用酒、藥物嚟減壓。」但他表示關楚耀沒有透露是否利用藥物來減壓。
阿倫又透露關楚耀本來要遲幾日才回港,因當地海關要辦手續,並非如部份報道所指是因他要等埋衞詩才一起回港,不過後來因手續辦理完成,故關楚耀才可提早回港,阿倫又謂不清楚為何衞詩不能一起返港。阿倫指關父向他表示關楚耀是無罪釋放,他說:「當地律師、警察局同繙譯都覺得好奇怪,話佢第二個case係冇罪,但詳情我就唔知,我都係聽佢爸爸講,到底係話佢所有無罪定係第二個冇罪,呢啲就要交畀佢自己講好啲。」至於兩項罪名分別是甚麼,阿倫也不清楚。
外間有傳因阿倫出面才令關楚耀可提前釋放,阿倫表示他只是曾向日本演藝人協會會長反映事件,並要求他們協助關楚耀和衞詩,當時對方表示會關注事件,但未有任何行動,阿倫又強調從沒為關楚耀向唱片公司求情,他說:「唔使,唱片公司覺得佢有價值就會衡量,求乜嘢情,求情都冇用,根本唔關畀唔畀面事,係在乎佢喺香港有冇市場價值,如果唱片公司覺得佢冇價值就會同佢即時解約。」

阿倫早前曾應關楚耀父母要求為契仔簽署求情信,他昨日透露求情信內容說:「講我同佢乜嘢身份同關係,我代表乜嘢身份同佢講說話,佢喺香港係好有影響力嘅artist,希望可以網開一面。封求情信影響唔到日本嘅法律,只係希望可以畀多少少關注件事。」

你情我願 唔信衞詩帶壞男友

問阿倫是否贊同棒打鴛鴦令關楚耀與衞詩分手?他謂男女感情屬私人問題,與局外人無關,並以其歌名《情憑誰來定錯對》作答案,指關衞二人若喜歡可以繼續在一起。對於外間揣測關楚耀是被衞詩帶壞,阿倫說:「係出面啲人估,牛唔飲水點㩒得牛頭低。」
此外,關楚耀所屬的環球唱片公司高層黃劍濤,前晚曾往探望關楚耀,黃劍濤昨日說:「佢個樣好疲累,所以我都冇同佢詳談喺日本發生嘅事,原本我係想佢呢兩日出嚟開記者會交代件事,但佢嘅情緒好似未ready好,所以個記者會可能會推遲多幾日。」問關楚耀今後可否再到日本時,他說:「我哋問過日本律師,律師話佢再去日本係冇問題,因為今次事件冇留案底。」
採訪、攝影:駱華齡、張俊銘、仇志德

全城熱話:圈中人同聲護衞詩

關楚耀(Kelvin)因涉藏毒在日本被拘留足足一個多月,前晚終獲釋返港,不過其女友衞詩(Jill)仍被關押,何時獲釋仍是未知之數,不少圈中人均希望大家可以給他們機會重新做人。

孫耀威:我噚晚同關楚耀通過電話,佢係話『我返咗嚟,大家有心』。佢承受咗好多嘢,希望佢同衞詩繼續好好做落去,畀個改過嘅機會佢哋。家等佢冷靜吓,瞓吓自己張床。

周秀娜:要幫就要公平啲,畀個機會男就要畀埋個女,佢都好慘。其實佢哋心理都受到好大挫折,希望大家畀機會佢哋。

莊思敏:恭喜關楚耀終於返咗嚟,希望佢快啲平復心情,同埋大家畀個機會佢,佢都困咗一個月,已經係一個好大懲罰。至於阿Jill,我覺得要罰佢都救咗佢返嚟先,公司同家人都係,咁先有人情味。

龔嘉欣:關楚耀喺日本拘留咗成個月,家平安返嚟大家都好開心,相信佢平復好心情先會出嚟交代清楚。佢家相信有好多事要處理,所以我覺得呢啲時間唔想打擾佢住,費事增加佢嘅壓力。作為朋友會擔心同關心佢,我會過多一排先同佢聯絡。

古巨基:我都有睇報道知道Kelvin返咗嚟,咁衞詩情況點呢?我好希望事件快啲結束,同埋大家唔好再畀佢哋兩個太大壓力,因為過去呢一個月佢哋都承受好大壓力,只要佢兩個肯認錯,希望大家可以畀佢哋一個機會。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載