› 選擇地區
三藩市
紐約
洛杉磯
其他美國地區
香港 台灣 北美
 
2010年08月31日

屢敗屢戰驚戀情見光死
Mango帶猛男返香閨唔認數

Mango與猛男踢住情侶人字拖,男友更拿着盒裝紙巾,不時情深款款望住Mango。

王秀琳(Mango)跟熊黛林拗手瓜爭郭富城失敗後,爭黃曉明又輸給Angelababy,雖然Mango在情場上屢戰屢敗,但未有令她停下腳步。大前晚,記者目睹Mango偕一高大俊男踢住情侶人字拖到跑馬地開餐,之後到超市買紙巾,再齊返Mango的跑馬地香閨。不過她昨日否認戀情,莫非怕見光死再打敗仗?

情場上連番戰敗的王秀琳,月前被指翻撻前男友、柬埔寨航空太子爺Homan,又被傳媒拍到有型男夜訪跑馬地黃泥涌道香閨,事後Mango否認跟型男拍拖,揚言他只是上門整電腦而已。不過,大前晚Mango又被發現偕另一位更高大威猛的俊男夜遊,二人撐完枱腳後再到超市買紙巾返歸。

拍拖晚飯逛超市

大前晚7時半,一身街坊裝的Mango和高大猛男齊齊踢住情侶人字拖現身跑馬地,二人步行到成和道的皇府食晚飯,逗留了一小時左右便飽肚離開。晚飯後,猛男拿着一樽汽水與Mango在街頭散步,二人有傾有講,不停在跑馬地一帶兜圈。
之後,Mango與猛男到附近超市購物,其後猛男拿着一袋五盒的紙巾離開。Mango興奮地跟猛男講個不停,猛男則不時情深款款望住她,二人之後便踱步返回Mango的跑馬地香閨。
記者昨日致電Mango,問她大前晚是否與猛男在跑馬地食飯時,她初時以相當肯定的語氣否認說:「冇,冇啲咁嘅事!」

稱成班朋友在家

直至記者告訴Mango拍下照片,她始說:「普通朋友嚟啫,我哋唔係拍拖,嗰晚其實成班朋友去咗我屋企,我哋落街買啲嘢啫。」遺下大班朋友在家,兩支公落街食飯,確令人感到莫名其妙。
Mango又表示現時感情生活空白,問她是否因為連番受挫而對感情事沒有信心?她說:「唔關事,想專心啲做嘢啫。我家多數喺台灣做嘢,所以一返嚟香港就會約啲朋友聚吓。」
採訪、攝影:楊浩賢、羅德光

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載