智取大市:買南航炒復蘇概念 - 晉佳

更新時間 (HKT): 2012.11.26 05:20

晉佳近期留意航空股,原因有幾個,第一,航空股絕對緊貼內地經濟周期表現,如果市場炒作內地經濟復蘇,一定唔少得呢瓣;第二,中央未來要大力收窄貧富懸殊,搭飛機對內地人嚟講,長遠會由中高檔消費變為中低檔消費,航空客貨運都會係受惠行業,中長線前景唔太曳;第三,航空股走勢落後於其他板塊,未來追落後空間大。

香港上市嘅航空股有國泰(293)、國航(753)、東航(670)同南航(1055),論內地航線比重,最高係南航,最低係國泰。你睇呢批股份嘅表現,好明顯年初至今國泰走勢勝一籌,南航就最差。估值方面,上述4隻股份嘅市賬率分別係0.98倍、1.17倍、1.23倍同0.86倍,南航亦係當中最低。如果博政策受惠加上經濟反彈,揀股方面,南航應該係最值博,因為內地航線比重較高,受惠內地經濟復蘇程度,係航空股之中最大。

現價買 短線睇3.9元

關心你飯碗,貼近你生活,即Like「蘋果ATM」FB專頁!
BannerBanner